تنظيف فرش المكياج

السلام عليكم ورحمة الله وبركاته

كيفكم اليوم ؟..إن شاء الله كلكم بخير :)

تدوينة اليوم بتكون عن تنظيف فرش المكياج بالمواد المتوفرة في البيت..

و أكيد كلنا يعي أن نظافة الفرش تنعكس على نظافة المكياج وخلوه من الشوائب..

ايضاً لما تكون الفرش نظيفة يقل إحتمال تحسس بشرتك.

فيه طرق كثيررره لتنظيف الفرش ، وفي مستحضرات جاهزة تستخدم لتنظيف الفرش ، أغلب محلات المكياج تبيعها..

مثلا :منظف الفرش من ماك ، مكياجي ....الخ.

وطريقة استخدامها مررره سهله..

طيب..في بنات ماتتوفر عندهم هالمنتجات ،أو خلصت وهما ما انتبهوا ..

أقولكم مافي اي مشكله تقدري تنظفي فرشك بمنتجات موجودة في البيت..

الاشياء اللي تحتاجيها هي : زيت زيتون  و شامبو أطفال (أو أي شامبو ، أو سائل غسيل الصحون )..

نبدء على بركة الله

الفرش تتجهز لحمام الهنا P:

أول شيء أقسم الفرش :اللي أستخدمها للشدو والأشياء البودر لحال.

واللي أستخدمها للأشياء الكريمة لحال.

بالعادة ابدء بتنظيف الفرش اللي أستخدمها للحاجات الكريمية.

مثل: فرشة الأساس والكونسيلر والكحل والروج ...الخ.

في زبدية صغيرة أحط زيت زيتون أو أي زيت تفضلينه.

ابدء أفرك الفرشة بالزيت ،يمين يسار .

لين ماتشوفين المستحضر بدء ينزل.

وممكن تسويين نفس الطريقة على منديل ورقي.

تفركين الفرشة في الزيت وتنزل كل المستحضر على المنديل.

خلصنا من المرحلة الأولى لتنظيف الفرش الكريمية.

والآن ببدء طريقة المرحلة الثانية وهي نفسها طريقة تنظيف الفرش اللي نستخدمها للبودر.

احتاج لشامبو أطفال (أو أي شامبو) أو سائل غسيل صحون (أستخدمت فيري بالليمون P: )

::الصور لأكثر من نوع للفرش ::

1. ابدء أفرك الفرشة في سائل التنظيف (يمين يسار لين ترغي شوي)
2. أزيد عليها شوي مويه و أستمر في فركها.
3. حتنزل كل المستحضر ويتغير لون الموية.
4. أغير الموية و أرجع أغسل الفرشة .
5. لما أغير الموية و أحرك الفرشة فيها ومايتغير لونها تكون الفرشة نظفت.
6. أعصر الفرشة بخفة (أمسكها بالمقلوب واضغط بأصابعي عليها عشان أطلع الموية الزائدة).

بعد ما خلصت هالخطوات أتركها تنشف بشكل مائل.

وبس خلصنا تنظيف الفرش.

* فرشي كلها من مكياجي ، عندي المجموعة الكبيرة (لها سنتين أستخدمها ومازالت ممتازة) ، وفرش مفردة أخذتها في أوقات متفرقة.

أتمنى أن التدوينة عجبتكم و أفادتكم.

و أنشروا التدوينة وشاركوها مع صحباتكم .

في امان الله