السلام عليكم ورحمة الله وبركاته
كيفكم اليوم ؟.. إن شاء الله كلكم بصحة و عافية ♥
فرش المكياج تعتبر شيء ذا أهمية في إبراز المكياج بشكل جميل و مرتب
بتكون تدوينة اليوم عن مراجعة تفصيلية عن مجموعة فرش مكياجي.
في بنت جميلة في الانسقرام طلبت مني هالمراجعة ♥
مكياجي عندهم خط للفرش ..عندهم ثلاث أحجام للحقائب :صغيرة (6 فرش)- وسط (10 فرش)-كبيرة (17فرشة).
وفي فرش مفردة من جميع أنواع الفرش.
عندي الحقيبة الكبيرة و 4 فرش مفردة.
بالنسبة للحقيبة هي عندي من سنتين..
أما الفرش المفردة اشتريتها في فترات متفرقة ..آخر وحده أخذتها قبل 5 أشهر.
الفرش عندي مو شرط أستخدمها لاستخدام معين ، ممكن أستخدمها لأشياء أخرى ..و كل وحده تقدر تستخدم الفرش للغرض اللي تشوفه مناسب لها.
في البداية بتكلم عن المجموعة الكبيرة.
وصف مكياجي لها و سعرها على موقعهم .
هذه هي حقيبة الفرش الكبيرة شكلها من الخارج ، هي من الحقائب اللي تنلف بشكل حلزوني ، والخامة اللي مصنوعه منها الحقبية هي الجلد..
تحتوي على 17 فرشة :(مابين فرش للوجة - العيون - الشفاه - الحواجب والرموش ).
نظرة عامة للحقبية ..ونلاحظ وجود جيب في الجانب..
نظره أولية على الفرش ..
شعرات الفرش صناعية قريبة جدا من الطبيعية في العموم، وناعمة على الوجة ، تأخذ كمية جيدة من المنتج.
فرش الوجة
من اليمين :
فرشة البوردة : من أكبر الفرش في هذه المجموعة و أعتبرها من الفرش العملية والأساسية تقدري تستخدميها للبودر و البلش و كمان للكونتور - كيف ؟ اضغطيها بين اصابعك حتى تصير بشكل يساعدك على تحديد الوجة-.
فرشة البودر المشطوفة : أصغر من اللي قبلها مناسبه جدا للبلش و الكونتور.
فرشة الكابوكي المسطحة الصغيرة "flat kabuki brush " : أكثر إستخدام لها في الإضاءة والكونتور.
فرشة المروحة : تستخدم للإضاءة و أيضا لتنظيف الشدو المتناثر.
بالنسبة لهذه الفرش لاحظت انها مناسبة للاستعمال مع الأشياء البودر ،ما اعتقد انها بتكون مناسبة للإشياء الكريمية .
فرشة الكونسلير : في شكلها تشبه فرشة الظلال لكنها أطول شوي و مضمومه على نفسها ، مفيدة في إستخدام الكونسلير في تغطية الهالات و بعض الآثار.
فرش العين :
من اليمين :
الثلاث فرش الأولى كلها للظلال ، الصغيرة منهم مناسبه لتحديد العين تحت خط الرموش السفلية.
بعدهم فرشة الدمج شكلها شوي منفوش تنفع لدمج الظل و تمويه أطرافه.
الأخيرة فرشة القلم : مناسبة لتحديد كسره العين و لتحديد العين تحت الرموش السفلية و لوضع الإضاءة عند مدمع العين.
من اليمين :
فرشة الإضاءة : استخدمها غالبا للإضاءة تحت الحاجب.
فرشة الإسفنجة : ما استفدت منها للآن D: و تجي معها قطع إضافية.
الفرشة المشطوفة : ممتازة لرسم الحاجب ، جربتها في رسم العين بالجل آيلاينر ماعجبتني النتيجة حقتها ، هذه الفرشة من النوع المناسب للمنتجات البودريه.
فرشة تحديد العين الدقيقة : تستخدم لرسم وتحديد العين .
القطع الإضافية لفرشة الأسفنجة.
من اليمين :
مشط الحواجب والرموش : " غضوا النظر عن الجهة المكسوره تعرضت لعنف من المستكشفين D: "
فرشة المسكارا
و أخيراً : فرشة الشفايف ، يميزها شكلها العملي و حجمها الصغير.
و هذه هي كل فرش المجموعة ، أستخدمها من سنتين و مازالت ممتازه ، ما تأثرت بالغسيل والتنظيف ، نادر جداً أشوف شعراتها تطيح ، بالنسبة لي كانت المجموعة عملية و ارتحت عليها .
في شيء ما عجبني فيها : الفرش اللي موجودة في المجموعات مو مكتوب عليها أسماء أو أرقام دلاليه ، أتمنى من مكياجي ينتبهوا لهذه النقطة .
الفرش المفردة
من اليمين :
فرشة الكابوكي : كتبت عنها تدوينة هنا .
هذه أحلى فرشة استخدمتها ، شعراتها مصنوعه من الألياف الصناعية، تنفع لاستخدامات كثيرة ، وحاليا مخصصتها للاساس ، تدمج بشكل كويس وتعطي تغطية رائعة .
فرشة السموكي : وصف مكياجي لها .
من الفرش اللي مستحيل أتخلى عنها ،فرشة عملية جدا ، وهي مخصصة للوك السموكي
تدمج من دون ماتبهت اللون.
الفرشة المائلة الصغيرة :وصف مكياجي لها .
هذه الفرشة مستحيل أستغني عنها ، لأنها مناسبة جدا لرسم الكحل ،حجمها الصغير سهل لي رسم الكحل جدا .
فرشة الأساس :وصف مكياجي لها.
تنفع لبعض الأساسات ، استخدامي حاليا لها مو كثير ، لكن ما أنصح بهالنوع من الفرش لأنها مو عملية مع كل الأساسات.
وبكذا خلصت مراجعة فرش مكياجي.
خلال السنتين اللي راحت كنت مكتفية بالمجموعة ، اما حاليا فحاطه في بالي كم فرشة من كذا ماركة مو متوفره هنا..
ملاحظة : صح احنا ندور الجودة في الفرش لكن لازم نهتم لميزانيتنا و هل نحن خبراء والا مبتدئين .
أنصح فيها البنات المبتدئات بقوة فهي متوفرة و سعرها معقول و جودتها جيده ، واذا شفتي نفسك أحترفتي فن المكياج وحابه تكملي طريقك فيه فخيارات الفرش كثيررررره قدامك.
حبيتي المدونة ادعميها بالاشتراك و النشر " كيف ؟ .. هنا الجواب "
في امان الله
تعليقات
إرسال تعليق