منتجات خلصتها :)

السلام عليكم و رحمة الله و بركاته

كيفكم اليوم ؟.. إن شاء الله كلكم بخير ❤

يا سلااام و أخيراً طلعت التدوينة للنور

اليوم حشارككم منتجات خلصتها  و هل ممكن أرجع اشتريها أو لا .

من فوق :

كريم 21 : احبه ككريم مرطب للقدمين و بكل تأكيد اشتريت واحد ثاني .

زبدة بالمرز : أتوقع كل اللي يتابعوني من زمان يعرفون أنها شيء أساسي عندي ، أكيد بشتري ثانية قبل ماتخلص .

قناع اللوز و الخيار من هيمالايا : قناع حلو من النوع اللي يتقشر ، قناع جميل و يخفف من الروؤس السوداء ، حالياً ماراح اشتري منه لأن عندي أقنعة ثانية حابه استخدمها.

غسول النيم و الكركم من هيمالايا : هذا أعتبره الغسول المنقذ لبشرتي لم تكون دهنية ، بالرغم من أن ريحته زي المطهرات الا ان نتايجه جميلة بالنسبة لبشرتي ، بالتأكيد راح اشتريه مره ثانية.

غسول للفم الودنت " AloeDent " : من غسولات الفم اللي احبها و بالتأكيد عندي ثاني منه قبل مايخلص .

من فوق :

كريم دوف لليدين بزبدة الشيا : جداً جمييل و ترطيبه رووعه ، للأسف ماعاد لقيته في السوق :(

تونر فيتامين E من بودي شوب : حلو ماشي حاله ، بس أنا ماحبيته .

كريم اللوز لليدين من بودي شوب : هذه المجموعة بالذات أحبها و دايم أشتري منها ، مع الاستخدام توحد لون اليد و بالذات لو استخدمتي الزبدة يبن الفرق .

بي بي كريم من بودي شوب : من البي بي كريم اللي أحبهم لما بشرتي تصير جافة ، حاليا مابرجع أشتريه.

عطر الزنبق من بودي شوب ريحته من الروايح اللي تجذبني أحسه منعش ، مريح ، جداً أحبه .

كحل أسود لداخل العين من ريفلون " بكلام الموظفة للعين الحساسة " حلو ومريح للعين ، لكن ثباته قليل جداً

مرطب شفايف من بيزلين ❤❤ هذا لازم يكون عندي منو احتياط قبل يخلص .

بي بي كريم غارنييه : لما كانت بشرتي مختلطة و مائلة للدهنية أكثر كان مناسب جداً ، لكن هالفترة بشرتي معظمها جاف و مايناسبها للأسف ماراح أرجع اشتريه.

برايمر من بودي شوب ماعجبني و مستحيل اشتريه مره ثانية .

و هذه هي المنتجات اللي خلصتها هالفترة ، لو كان في منتجات جربتوها 

أكتبوا تجربتكم معها في التعليقات .

* في كم بنت في انستقرام اقترحوا علي تدوينات معينة و جالسة أجهزها حالياً ، اذا حابين أكتب في موضوع معين اكتبوا لي في التعليقات *

في امان الله