السلام عليكم و رحمة الله و بركاته
كيفكم اليوم ؟.. إن شاء الله كلكم بخير ❤
اليوم بتكلم عن أقلام الكحل من نكس و رأيي فيها .
منتجات نكس أخذت شهره كبيرة بين البنات لدرجة ان الستاند يخلص بسرعة و يصير فاضي بالشهور ، نوعاً ما شيء محبط لما تروحي تبغى شيء من نكس و ما تلقيه بالذات الأرواج و جميع منتجات الشفاه يصير عليها هجوم ما ألقى غير التستر .
عموما في هذه الفترة صار في اهتمام بستاندات المكياج في أغلب المحلات من ناحية توفير المنتجات و الكولكشنات الجديدة ، شيء جيد و مريح .
من ضمن الأشياء اللي جربتها من نكس 3 أنواع من أقلام الكحل .
جامبو آي بنسل | Jumbo Eye Pencil
وصفة و شوية معلومات عنه :
كحل العين اللامع الذي يمكن استخدامه كظلال للعيون .
مصنوع من مزيج من الزيوت المعدنية و البودر .
قلم الكحل الجامبو كريمي و يرسم بسهولة دون الحاجة لسحب العين و لا يتلاشى أو يذوب .
تأتي في مجموعة من الألوان الزاهية .
وزنه 5 غرام و صالح لـ 12 شهر من تاريخ الإستخدام .
أماكن الشراء : سنتربوينت .
سعره أعتقد كان في العشرينات تقريباً ، عندي من زمان فما أتذكر كم سعره بالضبط .
تجربتي و رأيي فيه :
القلم مرررررره كريمي و سهل في الدمج ، استخدمته كـ آيلاينر و بيس للشدو و شدو .
الدرجة اللي عندي جايه على برونز لامعة " كتبت اسمها في الصورة الأخيرة " .
بصراحة في أول استخدام ماحبيته و لا أقنعني كمنتج و استنكرت ليه هالشهرة اللي عليه و هو كذا مو جيد .
بعد فترة رجعت استخدمه مرره ثانية و بكذا طريقة و وصلت لإستخدامات و نتائج تقنعني و حبيييته مرره .
حبيه كشدو و بيس للشدو مرره جميل و يمدي تسوي لوكات مرره كثيرة و جميلة ، مشكلته الوحيدة لو جفنك دهني بيخطط معك .
كمان حلو كآيلاينر برا و جوا العين و استخدمه بالفرشة .
قلم العيون النحيف | Slim Eye Pencil
وصفه و شوية معلومات عنه :
نحيفة .. تحتاج لبراية .. غير قاسية ..
تأتي في مجموعة كبيرة ومتنوعة من الدرجات الخلابة .
كريمية .. طويلة الثبات .. ضد الذوبان .
وزنه 1 غرام صالح لـ 12 شهر من تاريخ الفتح .
أماكن الشراء : سنتربوينت .
سعره : أعتقد في الـ 20 أو الـ 30 .
تجربتي و رأيي فيه :
هذا النوع من الأقلام كريمي و يعتبر الأخف بين الأنواع اللي جربتها من نكس و البعض يحسه ناشف .
من ناحية الثبات ثابته لفترة معقولة حوالي 5~6 ساعات ، واضح كآيلاينر برا العين أما جوا العين أبداً ما عجبني للأسف .
عادي ما في ميزة تخليني أفضله على بقية الأكحال اللي جربتها ، الحلو فيه إنه متوفر درجات غريبة و مو بالعادة أشوفها .
سلايد اون بنسل | Slide On Pencil
وصفه و شويات معلومات عنه :
لا تدعى ليونة هذا القلم تخدعك .
هذه التركيبة صافية و يمكن تمويهها و عالية الوضوح .
الألوان قوية .. تشبه أقلام الكحل السائلة و لكن من دون فوضى .
متوفر في 18 درجة لونية .
وزنه 1.2 غرام صالح لـ 12 شهر من تاريخ الفتح .
أماكن الشراء : سنتربوينت .
سعره في الـ 40 ريال .
تجربتي و رأيي :
هذا النوع هو اللي حبيته أكثر شيء و حسيته مميز جداً .
قوامه كريمي و لين و ينمد بسهولة ، ألوانه و اضحة و صبغتها قوية .
الحلو فيه انه ضد المويه و ثابت ما يتحرك من مكانه .
جميل لما تحطيه في طرف العين و تموهيه يعطي تأثير جميل ، على فكرة هو يجف بسرعه فلو كنت بتموهيه موهيه بسرعه .
هذا سواتش للأكحال على ورقة بيضاء و مكتوب عليه أسماء الدرجات .
و بس هذه هي تدوينة اليوم و رأيي عن هذه الأكحال .
لو لكم تجارب معها اكتبوا في التعليقات
صفحاتي الإجتماعية في يمين المدونة
في امان الله
المدونه جميله والمعلومات مفيده جدا....يا ريت لو تعملى مقارنات بين نفس المنتج لشركات مختلفه عندك وتقوليلنا مين احسن
ردحذفتسلمي يا جميلة ❤❤
حذففكرة حلوه .. حأسويها مستقبلاً بإذن الله .
أحب اللي يعطوني أفكار جديدة أو يطلبوا تدوينات معينة �😍�