السلام عليكم ورحمة الله وبركاته
كيفكم بنات ؟.. إن شاء الله كلكم بخير
كوني جزء من عالمي ~
في الحقيقة ماعندي روتين ثابت في الإستحمام ، لذلك راح أتكلم عن النقاط الأساسية اللي أشوفها مهمة في هذا الروتين .
بالإضافة إلى مو شرط تتبعي نفس روتيني ، خذي منه الأشياء اللي تفيدك ، و أكيد كل وحده منا لها روتينها الخاص ممكن نتشابه فيه لكن مستحيل نتطابق ، كل وحده عندها مشاكل تختلف عن الثانية و طريقة العناية تختلف من وحده للثانية .
و أيضا منتجات العناية مستحيل كلنا نتفق على نفس المنتج ، خذي اللي يريحك و تحبينه و يناسب ميزانتيك .
التقشير
من وجهة نظري تقشير الجسم أهم خطوة في الإستحمام ، تساعدك في التخلص من الجلد الميت و تعطي نعومة للبشرة .
طبعاً الإفراط فيه بيعطيك نتائج عكسية و سيئة ، من المهم إنك تعرفي كل نوع من أنواع التقشير ايش فوائدة و هل يعتبر قوي على البشرة أو لا و كم مرة استخدمه .
التقشير الجاف للجسم : استخدم فيه فرشة خاصة بالجسم نفس اللي في الصورة - اللي عندي أخذتها من بودي شوب و كمان تلقوا زيها في الصيدليات و محلات العناية - هذا النوع من التقشير جميل جداً و مايأخذ وقت و لايحتاج شغل كثير .
طريقته بإختصار : تفركي جسمك بحركات دائرية و هو جاف من الأقدام طلوعاً إلى القلب و من اليد إلى القلب - لو بحثتوا في النت بتلقوا عنه معلومات مفصلة - ، اسوي هالنوع من التقشير حوالي 3 مرات بالأسبوع على الأكثر .
تقشير عميق : هذا النوع من التقشير أسويه مره في الشهر على الأقل ، أستخدم فيه أي نوع من المقشرات القوية زي ملح الحليب أو صنفرة كاب مع الليفة اللي على شكل قفاز أسهل لي في الإستخدام .
من الفوائد اللي اشوفها مع هذا التقشير .. نعومة و تجدد في البشرة ، اذا كان عندي شعر تحت الجلد كله يطلع .. بإختصار تحسي جلدك يتنفس بحرية .
تقشير بسيط أو لطيف : أستخدم فيه منتجات تقشيرها بسيط زي الشاور جل المقشر أو مقشر جسم لطيف و هو اللي استخدمه غالباً - مثلاً منتجات ايف روشيه اللي في الصورة - ، هذا النوع من التقشير أسويه كل جمعه و هو اللي مستمرة عليه هالفترة .
بتكلم عن مقشر الجسم بالفانيليا العضوية من ايف روشيه - العلبة يسار الصورة - .
قوامه كريمي دسم وفيه حبيات تقشير صغيرة ، يستخدم على بشرة مبتلة و يستخدم مرة أو مرتين خلال الأسبوع .
طريقتي فيه : بعد ما ابلل جسمي أوزع كمية بسيطة من المقشر على جسمي و ألبس الليفة اللي شكل قفاز و أبدأ أفرك جسمي بحركات دائرية ، لما أخلص أغسل جسمي بشكل جيد و النتيجة جميلة نعومة و نظافة و للمعلومية هذا المقشر من النوع اللي يعطي ترطيب بسيط لكن مايغني عن الترطيب بعد الإستحمام طبعاً .
الجل شاور
لا أنكر إني كنت أتحاشي أشتري جل شاور من أي ماركة كانت و السبب إني سبق و صار لي تحسس في البشرة من جل شاور لشركة معروفة .
حالياً صرت أنتقي بعض الأنواع اللي أكون قريت مكوناتها و تأكدت إنها خالية من المكونات اللي أتحسس منها .
الشاور جل ينظف .. يعطي ريحة حلوة و بعضها يكون مضاف لها خاصية ترطيب أو تقشير .
لما استخدم الشاور جل أحب استخدم معه الليفة المنفوشة .
لكن بشكل عام أشوف إن الشاور جل منتج كمالي ، يعني لو كان عندك تماام و لو ماكان عندك ما راح يأثر على روتين عنايتك .
بتكلم عن المنتجات اللي في الصورة - من اليمين - .
جل الإستحمام من نيفيا : من المكونات المضافة له الزيت يعطي شعور جميل بالترطيب ، سبق و تكلمت عنه في انستقرام .
جل الإستحمام المقشر من ايف روشيه : هذا الشاور جل فيه خصائص تقشير فلو أبغى أحصل على أقصى فائدة من التقشير استخدمه مع ليفة القفاز ، بالإضافة إلى إنه خالي من البارابين ، ينظف و يعطي شعور إنتعاش .
الصابون
هذا النوع هو أفضل تجاربي إلى الآن ، برغم إنه مكتوب عليه " مع مرطب " ما أحسه يرطب لكن يظل أفضل من الصوابين الثانية
حلو للإستخدام اليومي و بعد التقشير الجاف .
الترطيب
و هذه أهم أهم أهم خطوة .
الترطيب مهم في الحفاظ على النتيجة اللي وصلتي لها بعد التقشير و تنظيف الجسم .
شخصياً أحب استخدم زبدة بالمرز للأماكن الجافة و جل الفازلين أيضاً لكن أفضله للأقدام أكثر شيء .
و بقية الجسم أرطبه باللوشن ، حالياً بستخدم لوشن الصبار الملطف من فازلين و ترطيبه جميل .
و ما أنسى أتعطر بعد هذا الحمام اللطيف بعطري المفضل .
بكذا خلصت تدوينة اليوم ، إن شاء الله ما أكون نسيت حاجة .
اكتبوا لي في التعليقات عن روتينكم و ايش هيا المنتجات اللي تفضلوها
صفحاتي الإجتماعية في يمين المدونة
في امان الله
ماشاءالله حلو
ردحذف❤
حذفروتين التقشير تبعك حلو♡♡
ردحذفتنصحيني اشتري زبدة الكاكاو من بالمرز ولا في احسن منها ؟؟
ردحذففي المحلات اللي هنا ، هي أفضل شيء جربته و مستمرة عليها .
حذفو أكيد أنصحك فيها 👍🏼