السلام عليكم و رحمة الله و بركاته
كيفكم بنات ؟ .. إن شاء الله كلكم بخير .
من زماااان مانزلت شيء في هالقسم ، يبغالي أصير نشيطة هالفترة و أنزل لكم وصفاتي .
وصفة اليوم خفيفة و سريعة و هي سندويشات شيش طاووق .
أستخدمت شيش طاووق جاهز ، مايحتاج مني غير أحطه في الفرن و بعدها على الساندويش .
بالعادة أتبل الدجاج بنفسي ، لكن ساعات مايكون في وقت فهالوصفة حلوة للبنات الكسولات و المشغولات .
كوني جزء من عالمي ~
المقادير :
شيش طاووق جاهز - خبز أو عجينة فطائرك المفضلة في السندويشات " في وصفة اليوم سويت الفطائر اللي أحبها للسندويشات " - صوص طحينة - بطاطس مشوي .
مكونات إختيارية : مخلل خيار - كاتشب - جبنة شيدر مبشورة .
 |
| المقادير جاهزة :) |
أول شيء بنسوي عجينة الفطاير .
مقاديرها :
3 أكواب دقيق - ملعقة كبيرة و نصف سكر - رشة ملح - ربع كوب زيت - ملعقة كبيرة خميرة تذوب في كوب موية دافية - بيضة .
طريقتها :
تخلط المقادير الجافة أولاً ، ثم نضيف لها بقية المقادير و نعجنها - الصورة 1 و 2 بعد إنتهاء العجن - .
نتركها تتخمر من 10 ~ 15 دقيقة " بالعادة أتركها تتخمر حوالي 20 دقيقة " .
بعد ما أتخمرت أقسمها إلى 10 كور تقريباً و أفردها لحد ماتصير رقيقة - الصورة 3 بعد التخمير ، الصورة 4 بعد ماقسمتها - .
و أحمرها على الصاج ، النار تكون وسط .. ماتأخذ وقت كل وجة تقريباً حوالي دقيقة أو نص دقيقة - الصورة 5 و 6 - .
 |
| نوع الشيش اللي أستخدمته ، و فوق يمين : قبل ما أدخله الفرن ، و يسار : بعد ماخرجته من الفرن و حمرته شوي على الصاج . |
قبل ما أجهز الفطاير للتحمير أكون حطيت قطع الشيش في صينية و دخلتها الفرن ، تأخذ حوالي 10 دقايق و تصير جاهزة و ممكن تحميرها في الصاج لو حبيتي تبين ذهبية و مقرمشة .
وقت لف الساندويش
من الأشياء اللي أحب أحطها في الساندويش : صوص الطحينة ، مخلل خيار ، بطاطس مشوية ، و أكيد قطع الشيش .
أرتبها على الفطيرة و ألفها و ما أنسى ألفها بورق الساندويش .. و بالعافية .
طبعاً تقدروا تحطوا أي مكونات تحبوها مو شرط نفس طريقتي .
لو ماكان عندك وقت تسوي الفطاير بنفسك - مع إنها ما تأخذ وقت من عجنها إلى خبز أخر قطعة منها حوالي 30 دقيقة فقط - تقدري تستبدليها بالخبز العربي الجاهز.
المره الجاية راح أكتب لكم عن طريقتي في البطاطس المشوية و صوص الطحينة في تدوينات منفصلة طبعاً .
صفحاتي الإجتماعية في يمين المدونة .
في امان الله
يممي شهيتيني باين عليها لذيذه
ردحذفو حييييييييييل حبيت طريقة العجينه تنفع للريوق بعد
عليج بالعافيه و فعلاً سهله وما تاخذ وقت
ان شاء الله لي تجربه لها .. مشكوره .
بالفعل تنفع لحاجات كثيرة 😋
حذفالله يعافيك حبيبتي ❤
العفو 🌹