السلام عليكم و رحمة الله و بركاته
كيفكم بنات ؟ .. إن شاء الله كلكم بخير يارب 💖
من فترة حطيت لكم في انستقرام صورة لـ مشترياتي من ماكس فاكتور ، بيني و بينكم قلت خليني أجرب شيء جديد غير الماسكارات من عندهم .. على فكرة كل الماسكارات اللي جربتها من عندهم ممتازة ادخلوا " هنا " لو حابين تشوفوا رأيي عنها .
المهم تدوينة اليوم بتكون عن نوعين جربتهم من الأكحال اللي هم : إكسس انتينسيتي لونق وير و هذا جاني كـ هدية على قيمة المشتريات - صدمتي إنه تيستر😩💔 ، اللي هون علي الصدمة إنه جديد مو مستخدم زي المنتج اللي تكمت عنه في انستقرام - ، و الثاني الكحل العادي المشهور بدرجة البيج .. تصدقوا من يوم هبوا فيه و أنا أدور عليه ماخليت مكان دايم مخلص أبغى أشوف و أجرب المعجزة اللي بيتكلموا عنها🤔 .. فقدت الأمل إني الاقيه و جربت من ماركات ثانية لحد ما جاء اليوم اللي فكرت أجرب شيء جديد من ماكس فاكتور و الموظفة ما خلت شيء الا تبغاني أشتريه و تسوق له و غالب إجاباتي لا ما أحتاجه 🙄🙄 .. فجأة قالت طيب فيه الكحل البيج .. أنا موجود ووينه ماشفته 😳🙃 😂.. تصدقوا كان نص الأكحال الموجودة من النوع العادي في الستاند الكحل البيج .. جالسة أقول في نفسي شكل طاح سوقه ما عاد أحد يدوره 😜 ، المهم أخذت منه أخيراً .
خلونا نبدأ نتكلم عنهم من ناحية الوعود اللي تدعيها
أولاً : Max Factor Excess Intensity Longwear Eyeliner
خذي إطلالتك إلى أقصى حد مع محددات Excess Intensity Longwear.
- ينساب اللون كي تحصلي على أثر قوي ويدوم .
- دقة انسياب الخبراء في قلم ذاتي الشحذ .
- قوة تدوم 12 ساعة من دون توقف لأثرٍ فائق .
- مضاد للتلطّخ ومضاد للمياه .
- متوفر بستة ألوان برّاقة .
سعره حوالي 61 ريال .
ر أيي عنه :
التعليب جداً بسيط و عملي .. مرا ما تحتاجي للبراية و لا تشيلي همها .
لما تجي تبرميه ابرمي شويه بسيط على قد الأستعمال .. ترى مايبرم الكحل بالعكس و لا يرجع ، فأحسن تخليه على قد الأستعمال .
التركيبة ناعمة جداً و بسهولة تنمد ، و النهاية له مطفيه بالنسبة للدرجة اللي استخدمها و في درجات ثانية النهاية لها لامعة .
كثافة اللون ممتازة من أول مره يبين لون كثيف و قوي .
الثبات أيضاً ممتاز .. استخدمته يوم العيد جوا العين و ظل ثابت تقريباً كانت المدة حوالي 6 ساعات .
من ناحية التلطخ و المويه ايوه كان صامد ما تأثر فيها .
بشكل عام حبيت هالنوع أكثر من أكحال ماكس فكتور و أفكر أرجع اشتري كم درجة ثانية المرة الجاية بإذن الله .
الدرجة البنية كانت عمليه معي .. فكنت أقدر أستخدمها لجوا العين و برا و أحياناً أخذ بالفرشاة من الكحل و أحدد فيه طرف الحاجب و يطلع ممتاز و في بعض اللوكات أدمجها مع الظلال تطلع بيرفكت .
ثانياً : Max Factor Kohl Pencil
 |
| سواتش :) |
لإطلالة أنيقة وجذابة طوّرنا قلم كحل العيون ليكون متماسكًا بما يكفي للتحديد الدقيق وناعمًا بما يكفي لمدّه بسهولة وللحصول على نظرة سموكي.
إن قلم Kohl لتحديد العينين سهل الدمج وهو سلاحك السري للحصول على نظرة قوية وجذابة .
- قلم في غاية النعومة ورقيق على منطقة العين .
- متماسكة لدرجة تمكنك من الحصول على عينين محددتين بدقة .
- أمرغيها كي تظللي جفنيكِ أو تحت رموشك .
- الأداة المثالية لإطلالة عيون سموكي جذابة .
سعره حوالي 31 ريال .
الدرجة اللي أخذتها : 090 natural glaze
رأيي فيه :
التعليب تقيليدي مافيه أي ميزة عن العادة ، و طبعاً تحتاجي معه البراية .
التركيبة كريمية ناعمة سهلة في المد ، ما أدري ليه ساعات أحسه يعطي مظهر كأنه طبشور 🤔
المهم .. ما حبيته جوا العين ، ببساطة مو ثابت زي النوع اللي قبل يحتاج أثبته ببودر عشان يطول معي .
الميزة الحلوة فيه سهولة دمجه .. حبيته كإضاءة لزواية العين الداخلية و تحت الحاجب و كبيس لبعض الظلال مرره ممتاز في هالشيء .
ما أنكر إنه كمنتج جيد جداً لكن ما اتحمست أكرر تجربة الشراء له مرره ثانية .
و أخيراَ هذه هي تجربتي لأكحال ماكس فاكتور .
لا تنسوا تشاركوني تجاربكم عن المنتجات اللي تحسوها تستاهل التجربة من ماكس فاكتور .
تعليقاتكم تسعدني 💕
صفحاتي الأجتماعية في يمين المدونة 📱
كوني جزء من عالمي 💕
في امان الله
تعليقات
إرسال تعليق