منتجات خلصتها " سبتمبر 2016 " | ( Empties ( September 2016

السلام عليكم و رحمة الله و بركاته

كيفكم بنات ؟ ... إن شاء الله كلكم بخير يارب 💕

من كم يوم جاني تعليق على انستقرام من الجميلة المتفاعلة @alneaalhazen ، اعتبرها أكثر من متابعة من بداياتي في التدوين و كان لها تفاعل في حسابي ✨ ، اشكرها من كل قلبي على دعمها و كلماتها الحلوة 💕 .. صدقاً كانت من أسباب استمرار تواجدي في عالم السوشيال ميديا  ، @alneaalhazen الله يسعدك و يحقق أمانيك و يجعل أيامك كلها سعادة وفرح ❤🌹

 و ثاني حاجة انو هالتعليق فكرني انه لي كم شهر ما سويت تدوينة بالمنتجات اللي خلصتها ، آخر وحدة كانت برمضان .

اتفجعت من كمية المنتجات اللي لقيتها في الكيس 😳 ، على فكرة المنتجات اللي اخلصها مخصصة لها كيس أجمعها فيه حتى ما أفوت هالسلسلة من التدوينات ، مع ذلك صرت أنسى أكتب تدوينات منتظمة لهالسلسلة 😅

خلاص نبدأ التدوينة و بلاش هرج كثير 😐 ، كل وحدة تجهز كوب القهوة ☕ / الشاهي 🍵 و تروق على التدوينة .. شوي طويلة 😁

خلال الفترة الماضية تخلصت من بعض الأدوات القديمة و استبدلتها بجديد.

فرشة الجسم من بودي شوب و مبرد القدم أسعارهم اختلفت عن آخر مره .

يعتبرون من أدواتي المفضلة في العناية من فترة طويلة .. ما أعتقد أغيرهم هالفترة و لو جربت شيء جديد أكيد بكتب عنه 👍🏼

الشامبو و البلسم من مجموعة healing & vitamin E من OGX

بشكل عام كانت تجربتي لهم جيدة ، حتى تكونوا في الصورة قبل شهرين صارت مشكلة في شعري الفروة دهنية بزيادة و صار شعري شكله مزيت و متلصق في بعض شكله كان مأساوي من غير التساقط الغزير و في هالفترة لما أستخدمت هالمجموعة بدل ما تحسن من الوضع زادت سوء .. الشامبو كان يجفف شعري و يخليه يتشابك و البلسم يزيد من المظهر الدهني ، على طول وقفتهم و رحت اشتريت شامبو مطهر و وقفت كل منتجات الشعر عموماً و بعد كم استخدام استعدت شعري الصحي من جديد " الحمدلله " و رجعت استخدمت منتجاتي المعتادة من ضمنهم هالمجموعة و كان كل شيء طبيعي ، شكوكي اتجهت نحو الصبغة اللي استخدمتها لشعري قريت بعض تجارب البنات انه زادت من دهنية الشعر و أشياء مشابهة للي صار معي فالأغلب انه اختياري للصبغة ماكان موفق  " لو حابين أكتب تدوينة عن عنايتي بشعري و حلول لبعض مشاكل الشعر أكتبوا لي في التعليقات " .

نرجع نتكلم عن الشامبو و البلسم اعتبرهم عاديين في نظري مثل أي مجموعة متوفرة في السوبرماركت ، ما أعطت فرق كبير لشعري أو بالأصح ماشفت ميزة ظاهرة لها و كمان لما صارت المشكلة بشعري ما كان له أي دور في الحل بل كان يضيف لي مشاكل ثانوية حاله حال أي منتجات شامبو تجارية ، لذلك ما راح أرجع أشتري منها .

شاور جل مقشر من كوتاج 

منتجات هالماركة انضمت لـمفضلاتي ريحتها جداً جميلة و مريحة ، و كمان سعرها مررره معقول و في المتناول و الكمية بتكفي لوقت طويل .

اعتبر هالشاور جل حاجة مهمة في روتيني اليومي ، أفكر أجرب نكهات ثانية منه .

أكيد برجع اشتري منه مره ثانية .

سنفرة كاب 

هذا شيء ضروري عندي على القليل استخدمها مره بالأسبوع ، ايش احساس النظافة و الراحة اللي يجي بعده .

احس بشرة جسمي تتنفس و استرجعت رطوبتها و نعومتها بعد الشاور .

بالنسبة لمسألة التفتيح احسها جملة لجذب المستهلك لا أكثر و لا أقل .. هالمنتج عاجبني كمقشر جداً ممتاز .

دائماً أرجع اشتري منها .

زبدة بالمرز 

ترطيبها مرره ممتاز خصوصاً للأماكن الجافة في الجسم ، تعتبر من المنتجات المهمة عندي .

أكيد أرجع اشتريها .. أساساً عندي احتياط منها .

من فازلين لوشن و بخاخ العناية الأساسية 

هالفترة معلقة عليهم ، جداً حابتهم .. خصوصاً البخاخ يوفر على وقت في الصباح .

بالنسبة لـ اللوشنات كل فترة يعجبني شيء و أدمن عليه ، حتى اللحظة حابه هالنوع من فازلين و عندي منه احتياط ، لكن ممكن أجرب شيء جديد الفترة الجاية .. ليش لا .

مثبت الشعر من لوريال .

من سنوات و أنا استخدمه شيء اساسي عندي من المنتجات اللي أحبها .

أكيد بشتري منه .

كريم بيبانثين 

شيء أساسي عندي تكلمت عنه كثير .. و طبعاً عندي منه احتياط من قبل يخلص .

مزيل عرق بيزلين 

ما بشتريه ، أحسه أختلف عن زمان !

كريم تغذية الأقدام من ايف روشيه 

من أجمل المنتجات اللي جربتها لكن كميته قليلة و يخلص بسرعة ، أفضل منتجات الترطيب يكون حجمها اقتصادي و يكفي لمدة طويلة .

ما أتوقع أرجع اشتريه .. 

لوشن و شاور جل " Endless Weekend " من باث & بودي وركس .

يمكن ماتعرفون انه هالنوع من المنتجات المعتمد على الروائح العطرية لي فترة طويلة موقفة استخدامها ، سبق و جربت مجموعة من شركة ما و سببت لي حساسية و جفاف لذلك صرت أخاف استخدمها ، و من قريب قررت ارجع استخدمها و جربت من باث & بودي .. صراحة كنت ظالمة هالنوع من المنتجات طلع فيها شيء زين مو كلها شينة زي ما كانت تجربتي السابقة .

المهم المجموعات بهذا الحجم الصغير مرره جميلة و تنفع كهدايا .. يجي معها بودي مست و ثباته معقول زي 4 ساعات كذا .

هل اشتريها مرره ثانية .. ايوه ممكن ليش لا ، لكن حأجرب روايح ثانية .

غسول بايودرما للبشرة الدهنية 

محتل الترتيب الثاني في غسولاتي المفضلة ، سبق و تكلمت عنه هنا .

ايوه ممكن اشتريه ثاني و ثالث و رابع لو كان غسولي المفضل رقم 1 مش موجود .

تونر من مجموعة بيور سيستم 

تكلمت عنه - هنا - .

و عندي منه إحتياط قبل مايخلص .

يعجبني فيه إنه كميته إقتصادية و يكفي لمدة طويلة ، كمية بسيطة منه كافية لكل الوجة .

مزيل مكياج العيون من نيفيا 

من ألطف مزيلات مكياج العين اللي جربتها ، تكلمت عنه - هنا - .

أكيد بشتري منه ثاني .

إيفاكلار ديو+ من لاروش بوزيه 

من منتجات العناية المفضلة اللي ساعدتني في التخلص من حب الشباب و آثاره .

تكلمت عنه - هنا - .

حالياً عندي مايقوم مقامه ، ممكن اشتريه مستقبلاً لو احتجت له .

كريم اليدين من قرين لاند .

تكلمت عنه في انستقرام .

بشكل عام جيد في الترطيب ، شكل علبته حلو للشنطة مايأخذ مساحة .

لكن ماوصل لدرجة إني أفضلة و أرجع اشتري منه ، عندي كريمات مفضلة و في منها إحتياط .

قناع الفحم من بيوريه 

نتيجته فعاله يسحب الزيوت الزائدة من البشرة و حرارته تفتح المسام فأحب أستخدم بعده قناع اللوز و الخيار من هيمالايا حتى ينظف المسام من الداخل و يشيل كل الرؤوس و الشوائب اللي في المسام .

ممكن أرجع اشتري منه ، للمعلومية ترى يعتبر شوية قوي على البشرة فما أعتقد راح يناسب الكل .

صابونة الفحم من بيوريه 

هذه ما حبيتها أبداً ، يمكن استخدمتها أسبوع و وقفت .

كل بعد استخدام لازم كم حبة تشرف .

رجعت استخدمها على أيام متباعدة و نفس المشكلة ، لذلك تركتها على جنب .

طبعاً مابرجع اشتريها .

لصقات الأنف من نيفيا

من الأشياء المهمة عندي و طبعاً لازم يكون منها احتياط .

تكلمت عنها - هنا - .

معجون سنسوداين .

جربت و رجعت له هو الأفضل في نظري .

أكيد عندي منه احتياط .

و أخيراً دور المكياج الشيء اللي مستحيل يخلص .

أساس استي لودر 

 من أجمل أساسات المناسبات اللي جربتها ، أفكر أجرب دولتشي اند غابانا بيرفكت مات شفت عليه مدح مرره كثير  و اتحمست اجربه خصوصاً بعد ماخلصت الدوبل وير .

كحل أسود من صبايا 

جمييل جداً من ألطف أقلام الكحل على العين .

روجين من صبايا

 هو في الحقيقة ما خلصتها لكن ريحتها اتغيرت فخلاص حان وقت رميها ، لها زمان طويل عندي .

روج ال ايه قيرل السائل 

ما حبيته نهائي و يكفي الفرص اللي جربته فيها خلاص حان وقت رميه .

كونسيلر مسيلين 

ثاني مره اشتريه عجبني جداً لكن عيبه في التعليب تظل فيه كمية غير مستخدمة .

ماسكرا من ماكس فاكتور 

جمييلة و من ماسكراتي المفضلة للدوام .

أخيراً و صلت لآخر التدوينة ، لو عندكم مقترحات لـ منتجات تستاهل التجربة  اكتبوا في التعليقات .

تعليقاتكم تسعدني 💕

صفحاتي الأجتماعية في يمين المدونة 📱

كوني جزء من عالمي 💕

في امان الله