ايووه موضوعنا اليوم عن منتجات استعملتها في الفترة الأخيرة من مكياجي 💄
ما أنكر مسائلة أنه هالمحل أخليه آخر شيء لما اتسوق ، مو انتقاصنا منه لكن أغلب احتياجاتي ما تتوفر فيه 🙄
مع هذا أنا أحب فرشهم و أرواجهم و أكحالهم و أمر المحل لـأجلها 😍😍
هالمنتجات اشتريتها من قبل شهرين تقريباً و في منتج ممكن مايكون متوفر حالياً لأنه " اصدار محدود " .
خلونا نشوف المنتجات و رأيي فيها ..
يوتوبيا بيرفكت ماتش طقم الأظافر و الشفاه " اصدار محدود "
من يوم وصلني اعلانها حطتيها في بالي و عالمحل جري .
جذبني فيها درجة الروز قولد المعتمدة للتغليف في هالمجموعة 💘💖
مجموعة يوتوبيا هي مجموعة الربيع لـ 2017 ، و هي اصدار محدود ممكن تلقونها متوفره الآن و ممكن لا .
فكرة هالمجوعة أنه شنطة صغيرة محتوية على روج و مناكير بدرجات متطابقة .
الدرجة اللي أخترتها هي 301
* الروج بنهاية مطفية .. ناعم و سهل المد ، مايجفف الشفايف و يظل ثابت لفترة معقولة تقريباً 4 ساعات و يحتاج لمسات تعديل بسيطة .
الدرجة لحمي داكن و تعتبر من الدرجات الدافية ، حلو على أغلب البشرات .
* المناكير .. شكل الفرشة رائع و يضمن سهولة الإستخدام للكل ، شخصياً أفضل المناكير اللي فرشها عريضة بنفس هالفكرة ، جفافه نوعاً ما سريع .. طبقة وحدة كافية منه حتى يبان اللون .. مشكلته لو ماحطيتي بيس كوت و توب كوت اليوم الثاني يبدأ يتقشر و يزول من حافة الظفر .
بشكل عام المجموعة حلوة و حبيت الروج أكثر .
سعرها كان بـ 79 ريال .
أحمر خدود و بودر سائب و كونسيلر كريمي
هالثلاث منتجات كان عليها عرض تأخذي 2 و الثالث مجاناً [ لو شغلتي عقلك العرض فعلياً يكون خصم أقل من 10% على كل منتج .. هو كذا و الا كذا حتوفري مبلغ ، لكن شخصياً ما أحب أنه الموظفة تجي و تقول لي " هنا عرض تأخذي 2 و الثالث مجاناً " و أشوف الفاتورة و يكون بس خصم بنسبة معينة على كل منتج .. حلو إنه تقول لما تأخذي 3 منتجات تحصلي خصم بنسبة كذا .
بهالشكل المستهلك يكون عنده ثقة أنه نفس الكلام اللي يقال من الموظف مكتوب في الفاتورة ، مو يقال شيء و أشوف شيء ثاني 😤😤 ] .
كونسيلر كريمي
لاحظت انه تنوع الدرجات جداً بسيط ، ويدور في نطاق معين من الدرجات .
التعليب على شكل عصار أحبه جداً 💕 يضمن لي استخدام المنتج لآخر قطرة منه .
التغطية متوسطة سهل في التوزيع و الدمج ، احتمال يخطط لو ماثبتيه ببودر .
ثباته معقوول .. مناسب للدوام و الطلعات الخفيفة .
بشكل عام منتج جيد لكن ماوصل يكون من مفضلاتي .
سعره 59 ريال و مع العرض بـ 49.67 ريال .
أحمر الخدود
اخترت درجة 301 جاية على لون وردي متوسط ، ينفع للإستعمال اليومي .
الدرجة تبين جداً طبيعية على البشرة .
بالنسبة للثبات أشوفه يعتمد على حسب الفاونديشن اللي تستخدميه .
كنت أقرأ و أسمع مدح على بعض بلاشرز مكياجي و جد طلع جيد .
حبيته و صرت استخدمه بشكل يومي .
سعره 59 ريال و مع العرض أخذته بـ 49.67 ريال .
بودر سائب
ما استخدمته غير مره وحده و نسيته بالدرج 😂😂😂😂
الصراحة كنت ناوية أخليه تحت التجربة زي بقية المنتجات و أتكلم عن رأيي فيه لكن سقط سهواً 🙈🙈
قريباً أرجع أحدث التدوينة و أكتب رأيي عنها بإذن الله .
سعره 59 ريال و مع العرض أخذته بـ 49.66 ريال .
تحديث للتدوينة [ 26 /6 / 2017 ]
بعد التجربة الكافية فإن رأيي فيها :
حبيتها لثبيت الفاونديشن للأماكن الدهنية و تثبيت البرايمر و الكونسيلر .
حلو للبيكنج " makeup baking powder"
بشكل عام أدت الغرض و فادتني .. هل هي الأفضل في نظري ؟!
ما عندي إجابة محددة .. ماجربت أنواع متعددة من البودرة السائبة فحكمي مابيكون دقيق .. لكن أعتبرها جيدة طالما أدت الغرض المطلوب منها .
و الآن مع الأدوات و الفرش
فرشاة دمج الظلال 208
بإااختصار و من الآخر هالفرشة صارت عشق 💘💘
دمجها للألوان جداً مضبوط و الحلو فيها إنك تقدري تغمقي و تدمجي اللون تدريجياً .
حلوه لدمج الظلال في كسرة العين و الزواية الخارجية للعين
لو بنصحكم بشيء واحد من هالمنتجات اللي تكلمت عنها أكيد بنصحكم بهالفرشة ضروري يكون عندك زيها 👌🏼✨
سعرها 49 ريال ، و على فكرة هذه الفرشة أخذتها قبل 8 أشهر .
إسفنجات صغيرة لدمج المكياج
جذبني إختلاف أشكالها و سعرها الحلو كانت بـ 29 ريال و مع العرض صارت بـ 19.66 ريال و أخذت منها اثنين .
في أول تجربة انصدمت من ملمسها و المادة المصنوعة منها ماكانت بالجودة المتوقعة😐👎🏼 صدقاً تحطمت آمالي عنها .
مع منتجات البودر جداً سيئة ، أما مع المنتجات الكريمية رائعة .
صح إنها تستخدم جافة أو رطبة لكن أفضلها جافة تعطي نتيجة أجمل .
أكثر شكل حبيته منهم اللي زي القطرة لونها أسود ما أتوقع أفرط فيها .
بشكل عام تعتبر جيدة و ماندمت إني اشتريتها ، عيبها فقط إنها ماتنفع مع كل المنتجات المتنوعة و جودتها عادية جداً.
و أخيراً محلات مكياجي صار فيها تطور أفضل من السنوات الماضية ، صحيح لما نقارن جودة منتجاتهم بماركات ثانية نشوف إنها تحصل على جودة متوسطة أو بما يقابل جودة منتجات الدرقستور الأخرى .
فعلياً عندهم منتجات تجنن و جودتها ممتازة الفرش كل اللي جربته منها عجبني و مازالت عندي من سنوات تتحمل الكرف و الغسيل .
العطور عندهم مجموعات مميزة ، الأرواج في تنوع حلو في الدرجات .
و أتوقع منهم يتطورون كمان في المستقبل .
و أنتو يا حلوات قولوا ايش رأيكم بمنتجاتهم ايش المنتجات اللي جربتوها و عجبتكم ؟ و ايش اللي كانت سيئة معكم ؟
في امان الله
حلوين المنتجات لي أخدتي، بالمناسبة هالماركة غير متوفرة عندنا بالمغرب لكن اختي بالامارات فمن حظي الجميل قدرت أجرب من منتجاتهم الماسكرا لي لونها وردي من برا حلوة و تطول و تكثف الرموش، و أيضا قلم العين البيج ممتاز و طلاء أظافر كان من مجموعة قديمة لكن ما أستخدمو ما حبيتو بصراحة.
ردحذفصراحه المحل ذا ساحبه عليه مررره ههههه بس لما شفت مدونتك تحمست امره
ردحذف