تجربة التسوق من [ M.A.C ] 💄

مساء الخير جمعياً 💕

و جيتكم بتجربة جديدة في التسوق اونلاين 💸💸💸💸💸

تدوينة اليوم تعجب و تهم محبات الميك اب 💄

و جربت موقع ماك أخيراً 😍😍

محلات ماك معروف و محبوبة عند بنات كثير و بمعنى لها شعبية كبيرة .

من مدة عرفت إنه صار لماك موقع و نقدر نطلب منه و تصل طلبياتنا إلى باب البيت و احنا مرتاحين .

في البداية هذا رابط الموقع " M.A.C "

الموقع يوفر خدمة الدفع عند الأستلام .

مع كل طلب تحصلي على عينة مجانية ، غالباً تكون عينات عطور .

في حال تجاوز مبلغ مشترياتك الـ 550 ريال تحصلي على شحن مجاني + 5 عينات مجانية .

كل منتجات ماك متوفرة في الموقع ، و زيادة عليها في منتجات حصرية ماتتوفر الا فيه .

:: العروض المتنو عة ::

هذه النقطة أستغليها كويس لإنها مررره مفيدة .

- عرض الـ 5 عينات مجانية على أي طلبية بأي مبلغ ، يجي في فترات كثيرة بس تابعي موقعهم و من يوم ينزل العرض أطلبي .

هذا العرض ميزته تجربي منتجات جديدة بدون ماتتهوري و تشتري الحجم الكامل و يا ينفع المنتج و الا العكس .

- عرض الشحن المجاني ، هذا فرصة للي مشترياتها قليل ماوصلت الـ 550 ريال ، فتكون وفرت مبلغ الشحن .

على فكرة أي طلبية مبلغها أقل من 550 ريال تدفعي تكلفة الشحن و هي 65 ريال .

وفي عروض أخرى لكن شفتها ما تكرر كثير ، مثل عرض شنط التجميل و يكون معها عينتين مجانية ، التخفيضات .

الشحن مع ارامكس و مايأخذ أكثر من 3 أيام عمل داخل جدة ، وبقية مدن المملكة 5 أيام عمل .

طريقة التسوق سهلة جداً

1- من هنا سجلي و كملي بياناتك .

2- هنا مذكور الـ 5 عينات المجانية و الشحن المجاني للمشنريات من 550 ريال وفوق .

3 - فوق في هذا الشريط دايماً يحطوا عروضهم الحالية و كلها تكون لفترة محدودة .

1- الأفضل من البداية تعبي بياناتك كاملة خصوصاً دليل العناوين ، حتى تستفيدي وقت العروض تلحقي تشتري و ما تأخذي وقت في تعبئة البيانات .

2 - هنا سلة المشتريات تضغطي عليها لما تخلصي تسوق و حابه تنتقلي لخطوات الدفع و تأكيد الطلب .

طريقة و ضع المشتريات في السلة سهلة جداً ، تضغطي على المنتج اللي حابته مثلاً المحددات تطلع لك الصفحة مثل الصورة و تختاري الدرجة "من المكان اللي عليه علامة النجمة " .

تحتها تلقي وصف دقيق لـ لون الدرجة و هذا شيء يعجبني في موقع ماك .

و بعد اختيار الدرجة المناسبة ، تختاري إضافة إلى الحقيبة .

بعد إنتهاء التسوق اضغطي على السلة .. اضغطي على إجراء تعديل لو حابه تعدلي أو تحذفي من طلبك .

أو تختاري الدفع فوراً لو متأكدة انه كل اللي في السلة حابه تشتريه .

1- هنا لو عندك كود خصم تحطيه و تضغطي على عرض الطلب .

2 - عينات .. هنا مع كل طلب تختاري عينة واحد منها و غالباً تكون عطور ، و هي مختلفة عن عروض العينات المجانية الأخرى .

لما تنزلي لآخر الصفحة .. بتبان لك تفصيل الطلب من رسوم الشحن و مبلغ الشراء و المجموع الكلي .

:: ملاحظة : ترى السلة معبيتها منتجات بشكل عشوائي حتى أوضح لكم لما تتعدى الـ 550 يطلع لك شحن مجاني فقط ، و صراحة مستحيل أفكر أوصل هالمبلغ عشان مكياج من مرة وحدة 😅😅😅😅 ::

خلصتي و حابه تتمي عملية الشراء ، اضغطي على " الإنتهاء و الدفع " و كملي الخطوات اللي بعدها "

أنا اخترت الدفع عند الإستلام ، و في خيار الفيزا / الماستر كارد لكن كان عندي مشكلة و ماقدرت استخدمها .

أتمنى مستقبلاً يكون عندهم الدفع عن طريق خدمة سداد لإنها مرره سهلة .. و من وجهة نظري أريح من الدفع عند الإستلام و أكثر أمنا و سهولة من الفيزا ، و الكل بلا إستثناء يقدر يفعلها .

هذا الشيء اللي أتمنى يضاف لطرق الدفع عند ماك .

فور إنهاء عميلة الشراء  وصلني إيميل شكر على الطلب و كل التفاصيل موجودة فيه .

أنا طلبت ليلة جمعة يعني عطلة نهاية أسبوع و ما أتوقع إنه الطلب يتجهز حتى غير السبت أو الأحد لكن يوم الجمعة الصباح و صلني إيميل إن طلبي جاهز و تم شحنه مع ارامكس برقم التتبع .

و استلمت طلبي صباح الأحد .. فعلاً سرعة في التوصيل تحسب لصالحهم .

الشحنة و صلتني محكمة الإغلاق و عليها ملصق إنه يحتاج يحفظ في مكان مبرد ، و هذا الشيء طمني من ناحية سلامة المنتجات خلال الشحن .

بصمة ماك و اضحة على صندوق الشحنة " و هذه النقطة من أي موقع تسوق اونلاين تحسب في صالحها و تعزز من ثقة المتسوق في الموقع و مدى الأهتمام في الشحنات " .

وقفت تأمل مع طريقة تقديم الفاتورة ، غالباً تجيني الفاتورة مطبقة و مع المنتجات أما هنا حسيت بالدلع صراحة 👸🏻

صورة عامة للطلب 

هذا هو طلبي .. الصراحة كنت مو متحمسه اطلب شيء واحد فقط و فوقها بدفع شحن صراحة ماكان يسوي .

لكن .. صادف إني لقيت عرض الشحن المجاني و الـ 5 عينات المجانية مع بعض 😍😍😍 فرصة ماتتفوت و طلبت .

هذا كونسيلر و كوركتر .. قريت عليه مدح مرره كثير و حاطته في بالي من فترة و جاء و قت التجربة وبعد فترة كافية أقلكم رأيي عنه .

كإنطباع أولي مبسوطة منه .

علبة عينة فاضية كترويج لإساسهم الجديد .. أزور المحل و استشير أخصائية المكياج هناك بإختيار الدرجة المناسبة و تعبيء لي العلبة منها .. فكرة حلوة ..

كيس العينات هذا أول ماشفته حسيت بالإهتمام .

حلو لو كل المواقع عيناتها المجانية تكون بعلبة أو نفس هذه الفكرة أحس بإحترافية العمل .

العينات المجانية الـ 5 من العرض .

من اليمين :

- ماسكارا Zoom Fast Black Lash .

على انها كلكعت في البداية .. لكن حبيت نتيجتها فيما بعد أعطت الرموش الكثافة و التقوس اللي أحبه .

و حطيتها في قائمة مشترياتي القادمة .

- مزيل مكياج العيون و المنظف الزيتي .

لسى ماجربت هالمنتجين .. مخليتهم لحدما يخلص مزيل المكياج اللي عندي و أبدأ أجربهم بعده .

- بريب + برايم بيس للبشرة .

يعادل درجة احمرار البشرة و لونها و يضفى لها بعض البريق .

هذا المنتج جديد علي ، نجرب و نشوف .

- ستروب كريم .

مشهور بشكل كبير و غالباً مخلص .

فرصة أجربه و أشوف ينفع أشتري الجحم الكبير أو لا .

و أخيراً العينة المجانية لعطر و اخترت بشكل عشوائي عطر روبي وو .

بإختصار مو على المود ، ريحته قوية .

بشكل عام حبيت موقع ماك و أفضل عندي من محلهم ، سهولة في التسوق و سرعة في توصيل الطلب .

و أكثر شيء عجبني طريقتهم في التغليف .. واضحة فيها لمستهم و ثقتهم بمنتجاتهم .

عدا أسعار منتجاتهم .. تحتاج ميزانه ومو كل ما اشتهيتِ مكياجهم تروحي تشتريه 😅😅😅😅

و أخيراً استغلوا عروضهم و استفدوا منها و تذكروا إنه بيدكم تقدروا توفروا و تستفيدوا من العروض بصالحكم .

لو جربتوا الموقع شاركوني برأيكم و انطباعكم عنه 

في أمان الله