صباح النور 😌🌷
الأجواء صارت جميلة و تخلي النفسية ممتازة 😍☕ و رجعت لي طاقة الكتابة من جديد 💻
اليوم قررت أشارككم بتجربتي و رأيي لجهاز التقصف من نزيه 💇🏻♀️
من أبرز مشاكل صبغ الشعر و التصفيف الحراري تسريع ظهور الأطراف المتقصفة ، ممكن منتجات الحماية و الترطيب تقلل من التلف المتوقع لكن يظل ظهور هالأطراف مزعج و يحتاج قص ✂️
جربت جهاز نزية لإزالة أطراف الشعر المتقصفة ( Oneteck ) ، و لاحظت إنه في أجهزة تقصف بمسميات مختلفة لكن لها نفس الشكل الهيكلي .. فقط يتغير الأسم - و مؤخرًا عرفت إنها تسمية خاصة بالتاجر الذي اتفق مع المصنع الصيني إنه يبيع له المنتج تحت هذا الاسم ، وأي شخص يستطيع التعاقد مع مصنع ووضع اسم خاص به اذا كان يشتري كمية تجاريه - ، و لاحظت هذه النقطة تتكرر مع الأجهزة المصنعة في الصين تشوفي نفسه تمامًا لكن الأسم مختلف زي واحد من أجهزة الليزر المنزلي المشهورة .
المهم خلونا نشوف محتويات صندوق الجهاز
الجهاز طبعًا
مشط لتقسيم الشعر - مشابك تقسيم الشعر - فرشاة تنظيف .
مفصلين مقاس ( 1/8 انش ، 1/4 انش ) لتحديد مسافة القص " تتركب في نفس الجهاز " .
محول كهربائي - حقيبة جلدية لحفظ الجهاز و مكوناته .
الجهاز عليه ضمان سنتين من نزيه ، و أخذته بأقل من 200 ريال .
صار له عندي قرابة السنة .
طريقة الإستخدام
1- في البداية لازم يكون شعرك نظيف مافيه أي زيوت أو كريمات .
2- قسمي الشعر لخصل صغير جدًا .
3- حطي الخصلة داخل الجهاز و إتاكدي إنه مقفل .
4- الجهاز يعمل في إتجاهين ، اختاري السهم اللي يشير للأرض .
5- لما تضغطي على المقبض حيشتغل الجهاز ، انزلي بهدوء لآخر الخصلة .
و كرري نفس الخطوات على باقي الخصل .
تنظيف الجهاز مرره سهل ، مذكورة الطريقة بالتفصيل في كتيب التعليمات .
رأيي في الجهاز
من ناحية سهولة الإستخدام فجدًا سهل و تقدري تسوي كل شعرك بدون الحاجة للمساعدة .
هل يساعد في التخلص من الشعر المتقصف .
نعم يساعد و يخفف بشكل كبير من التقصف ، و بالتالي تخف النفشة بشكل كبير .
بالنسبة لي ما أستغني عنه و مريحني كثير .. الأفضل في استخدامه يكون كل شهرين أو كل ما تلاحظي شعر متقصف ، و بعد كل جلسة تهتمي بالعناية الأساسية لشعرك حتى تقللي من ظهور التقصف لأطول فترة ممكنة .
سبق و تكلمت عن روتين عنايتي بشعري [ هـنـا ] .
في امان الله
حبيت التدوينه والجهاز محد قد تكلم عنه قبل بالعكس الاغلب صار يتوجه للصوالين ويدفع دبل قيمة جهازك بالجلسه الوحده
ردحذفيعطيك العافيه
الله يعافيك فاطمة 💐
حذف