صباح النور 🌹
عودة لتدوينات تجارب التسوق و اليوم بشارك تجربتي لأشهر موقع ملابس " بميزانية منخفضة " شي ان 💸💸
بشكل عام الموقع فيه خيارات مرره كثيرة في قطع الملابس ، تصوري و أنا اتصفحه ان القطع تنفع لطلات يومية و الدوام
المزايا اللي لاحظتها في الموقع قبل الطلب :
- التنوع في البضائع .
- ميزانية منخفضة + توفر أكواد تخفيض في كل وقت .
- الدفع عند الإستلام .
أيضًا لاحظت مستلزمات منزلية و مكتبية لكن الصراحة في بعض القطع لقيتها هنا بسعر أرخص من الموقع ، فالأفضل تقارنوا بين أسعار المحلات هنا و الموقع قبل ماتطلبوا القطع المنزلية .
أخذت قطع للدوام و رمضان و شوية ملحقات و أدوات جمالية .
بضيف لكم روابطها لو حبيتوا تأخذوا مثلها
فستان قصير
يعتبر من الـ tshirt dress و له تنسيقات كثيرة حلوة .
الخامة حلوة ، لكن في عيب في الخياطة لو تلاحظون في الصورة عند حردة الكم فيه غرزة مسوية زم المفروض مايكون كذا مقارنة بصورة القطعة من الموقع [ هنا ] .
بلوزة بطبعة جرافيك
خامتها بولستير فممكن كثير مايحبوا هالخامة و ما أشوفها جيدة وقت الصيف ، حلوة للربيع و الأجواء اللطيفة .
الطباعة جيدة و شكلها حلو في اللبس ، لكن لونها مع الأسف جاي على أصفر و هذه صدمتي فيها .
لطفت علي إنه يطلع شكلها حلو في التصوير [ هنـا ]
فستان صيفي
هذه القطعة مميزة جدًا و قماشها يجنن و بارد ، حبيتها مرره و راح استهلكه في الصيف بشكل كبير .
[ رابط القطعة ] .
فستان كيمونو
من القطع اللي عجبتني جدًا و أشوفها مميزة في رمضان و بعض المناسبات ، لكن قماشه شوية ثقيل و ماينفع في الأجواء الصيفية .
[ الرابط ]
حامل الفرش
حجمه شوية صغير مع ذلك يشيل عدد كبير من الفرش ، جودته عادية جدًا .
الأفضل توزعي الفرش فيه بشكل متساوي لأن لوحطيتها في جهة وحدة راح يميل مع الجهة الأثقل .
أعتبره يؤدي الغرض المطلوب منه [ الرابط هنا ] .
فرشاة الشعر
الفرشة حلوة للبيبي هير و لعمل بف بالشعر بطريقة مرتبة .
عيبها لما بديت استعلمها تساقطت شعراتها [ هـنـا ] .
أغطية الفرش
ما أعرف الأسم الصحيح لها ، هي شيء زي الشبكة ينحط على فرش المكياج حتى يحافظ على شكلها
حلوه و تؤدي الغرض لكنها حجم واحد يناسب الفرش الكبيرة و المتوسطة اما الصغيرة يجي واسع عليها شوي .
ممكن تتمدد و لا ترجع لشكلها السابق ، بمعنى إنها كم استخدام و تنرمي بعدها .
لو أنتِ دايم تغسلي الفرش و تستخدميها بتكوني شخص استهلاكي جدًا و هذه نقطة غير جيدة مع هالنوع من المنتجات ، فالأفضل يكون في فكرة أقل هدرًا و أكثر فائدة [ هـــنا ] .
# ملاحظاتي :
- الجودة متفاوتة بين القطع لكن في المجمل مقبولة .
- عيوب الخياطة لاحظتها في كم قطعة أما خطاء صغير في الخياطة أو طرف الخيط ماقصوه .
- المقاس خذوه بمتر القياس كل قطعة لها قياس مختلف .
- انتبهوا على معلومات القطعة و اعرفوا خامة القماش قبل ما تقرروا الشراء .
- لاحظت الملابس اللي عليها تاق شي ان جودتها أفضل .
- مدة التوصيل ممتازة ، وصل طلبي خلال 5 أيام مع ارامكس .. أما فترات الذروة مثل رمضان و الأعياد فطبعًا يتأخر .
- الأدوات المنزلية شيكوا عليها في المحلات احتمال كبير تلقوها بسعر أرخص من الموقع .
بشكل عام الموقع جيد و ممكن تطلعي منه قطع جيدة جدًا ، أعجبني قسم الفساتين و الملابس العربية مليان خيارات تحمسني أشتري منه مره ثانية .
و بكذا انتهيت من تدوينة اليوم
كيف كانت تجاربكم مع الموقع و هل كان خيار جيد لكم ؟
في امان الله
تعليقات
إرسال تعليق