مساء النور 🌷
من فترة شاركتكم على ستوري انستقرام العودة للهوايات اللذيذة ، و طلبتوا أنزل طريقتي في اللازانيا .
ببساطة الطريقة جداً سهلة و ما تحتاج غير 3 مراحل في التحضير .
المرحلة الأولى : تجهيز طبقة اللحم .
الكميات تقديرية ( لكن بحاول أقربها لكمية كليو من اللحم المفروم و أنتِ قيسي على الكمية اللي تحتاجيها ) .
في البداية شوحي بصلة مفرومة - حجمها متوسط - على النار و لما يبدأ يذبل ضيفي فص ثوم مفروم و قلبي شويتين و ضيفي الجزر المبشور- 3 حبات متوسطة الحجم - و قلبيهم مع بعض ثم ضيفي اللحم المفروم و ضيفي البهارات ( كمون - كزبرة - بابريكا - رشة زنجبيل ) و قلبيها لحد ما يتغير لون اللحم و ضيفي الطماطم المفروم - حوالي 4~5 حبات متوسطة الحجم - و اذا حسيتي أنكِ حابه تعززي لون و طعم الطماطم ضيفي ملعقة طعام من صلصلة الطماطم .
و الخطوة قبل الأخيرة ضيفي موية لحد ما تتساوي مع الخليط الموجود في الصاج و قفلي الغطاء و خليها على نار هادية من 7~10 دقايق لحد ما تتسبك و تتضبط .
الخطوة الأخيرة نضيف الشبت المفروم - نصف حزمة أو زي ما تحبي - ، و نضبط الملح .. و نقلب كل شيء حتى تتوزع المكونات بشكل معتدل و نطفي النار و نتركها على جنب شوية و نروح على الخطوة الثانية .
المرحلة الثانية : تجهيز صوص البشاميل .
في قدر نضيف ربع كوب زيت نباتي أو 35 جرام زبدة مع شوية زيت نباتي ونخلي النار هادية و ننتظره يسخن شوية و نضيف 4 ملاعق طعام دقيق و نقلب لحد ما نلاحظ إنه بدأ يتغير لونه نضيف الحليب السائل بالتدريج و نقلب و كل شوية نضيف كمية و نقلب لحد ما يمتزج الخليط مضبوط و يبين إنه شوية غلظ نضيف الملح و نخلط حتى نتأكد إنه توزع كويس و نطفي النار .
هنا الحليب لتر = 4 أكواب و لازم يكون دافي أو في حرارة الغرفة حتى نتفادي التكتلات وقت ما تضيفيه على الدقيق .
انتبهي تضيفي الحليب مرة وحدة على الدقيق الأفضل تضيفي شوية و تخلطي مضبوط و ثم تضيفي شوية ثانية و تكرري نفس العملية .
المرحلة الثالثة : تجهيز الصينية .
أول طبقة نضيف شوية من صوص البشاميل و نكون طبقة خفيفة منه ثم نضيف شرايح اللازانيا و نضيف طبقة متساوية من اللحم المفروم وثم نضيف شوي من صوص البشاميل بشكل عشوائي مو شرط يكون طبقة و نختمها برشة من الجبن المبشور - ممكن موزريلا أو موزريلا و شيدر تطلع 👌🏼 -
الطبقة الثانية نفس الأولى -> شرايح لازانيا -> لحم مفروم -> بشاميل -> جبن مبشور
بالعادة تطلع معي طبقتين أو ثلاث المهم لما تنتهي من الطبقات تضيفي شرايح لازانيا و فوقها طبقة سميكة من البشاميل و تتفنني في رش الجبنة و اذا تحبي ترشي أعشاب ايطالية راح تعطيها لمسة فنانة .
و خطوة أخيرة مهمة تضيفي كوب موية دافية على الصينية ، و غطيها بالقصدير و على الرف الوسط في الفرن .
شغلي الفرن من تحت على درجة حرارة 180 مئوي و لمدة 45 دقيقة ، و بعد ما ينتهي الوقت شيلي القصدير عن الصينية و قفلي الفرن من تحت و شغليه من فوق خليها تتحمر .
و قدميها بالعافية 😋🌹
في امان الله
جاري التطبيق������
ردحذف