السلام عليكم و رحمة الله و بركاته
كيفكم اليوم؟ .. إن شاء الله كلكم بخير ❤
كذا وحدة من متابعاتي الجميلات 🌹 طلبت مني هالتدوينة و آسفة تأخرت عليكم فيها .
في تدوينة اليوم بتكلم عن كيف حليت مشكلتي مع الحبوب و روتين عنايتي الحالي ببشرتي
خلوني في البداية أتكلم عن بداية المشكلة :
قبل كانت بشرتي شبه صافية فيها شوية آثار و كنت مرتاحة و متفائلة إنه خلاص بشرتي بتصير كويسة و صافية تماماً.
لكن ..
في شهر ذي القعدة من العام الماضي بدت تظهر لي حبوب حمراء و أحجامها مختلفة و متركزة في منطقة الخدود .
كانت مزعجة و مؤلمة في نفس الوقت .
كل مستحضرات العناية و المكياج الجديدة وقفتها ، بصراحة كنت متخوفة انه تحسس حصل بالبشرة وصرت استخدم منتجات البشرة الحساسة .
لكن طلعت إنها حب شباب ، لا تحسس و لا شيء .
ما أنكر إنه نفسياً تأثرت باللي صار لبشرتي و اللي أزمني زيادة ماكنت أعرف ايش سببها .
كنت موقفة استخدام المكياج و أي منتجات جديدة حتى العطور و قفت استخدامها ، و لا يوجد فرق يذكر الحبوب زي ماهي و تتزايد .
اتجهت للإمتناع عن بعض أنواع الأطعمة مثل : الحلويات ، المقليات ، و المشروبات الغازية و البهارات و الفاست فود " في الأصل أنا ما أكل هذه الأشياء كثير ، يعني في المناسبات أو لما أكون في خرجة عائلية برا البيت ".
بعد هذه الحمية تحسنت بشرتي بشكل بسيط جداً ، فرحت و في نفس الوقت كنت محبطة لإني ماعرفت السبب الحقيقي للحبوب .
طبعاً ما أهملت عنايتي ببشرتي بالعكس صرت مستمرة و محافظة عليها أكثر.
بعد هذه المرحلة قررت أزور عيادة البشرة و كنت متخوفة من الدكتورة اللي كانت فيها بس الحمدلله راحت و جات وحده غيرها .
شخصت الدكتورة الحبوب على إنها حبوب عادية و يكفي لها جلسات التقشير بالأحماض بعدها جلسات تنعيم البشرة .
كنت أدردش معها و أسالها ايش ممكن يكون السبب الحقيقي لهذه الحبوب وقالت لي : أكيد من الأكل المقالي و السكريات و الذي منه امتنعي عنهم و أكيد ماراح تطلع .. بصراحة ماحسيت اني متوافقة معها كوني جربت امتنع عن أنواع الأكل اللي قالتها و ماشفت فرق كبير .
بديت جلسات التقشير وبعد أول جلسة لاحظت فرق كبير و انبسطت منه ، و حسيت اني ماشيه على الخط السليم للعلاج و طردت كل الأفكار السلبية من رأسي .
بعد الجلسة الـ 2 و الـ 3 كان الفرق بسيط و ماعاد في تطور زي الجلسة الأولى .
رحت للجلسة الرابعة و كنت معصبة لأن الآثار الجانبية بدت تظهر " غمقان حول الفم و الأنف و جفاف شديد في الخدود " و سألتها كم جلسة باقي و كم سؤال ثاني .. جاوبتني و اللهي استجابة بشرتك بطيئة و ما أدري كم جلسة تحتاجي أنا هنا حسيت أن المسألة فيها استنزاف فلوس و تقولي ضروري تجي الجلسة الجاية و بصراحة مليت من التقشير و ما عاد صرت مرتاحة لها .. انزعجت و قررت اتركها هي و جلساتها ..
بعد فترة كنت أدور على دكتورة مختصة بالبشرة و بصراحة كنت محبطة أروح و ألقى طريقتها نفس الدكتورة اللي قبل .
نطت فكرة في رأسي " ياسلوى الحليب الحيواني له علاقة بحب الشباب ابحثي في هذا الموضوع يمكن تلقي حل "
بحثت بالعربي و أغلب المقالات اللي لقيتها كانوا يصرون انه لا توجد علاقة واضحة بين حب الشباب و الحليب .
و لما بحثت بالإنجليزي لقيت مقالة مفصلة عن علاقة الحليب الحيواني و بالذات حليب الأبقار بحب الشباب .. لما خلصت المقالة حسيت بفرحة انه ممكن يكون السبب كون قبل شهر ذي القعدة و بالتحديد في رمضان الماضي كنت اشرب الحليب الحيواني في كل يوم و يدخل في وصفات كثيرة كنت أسويها و استمريت في استخدامه مع القهوة كل يوم لحد ما اكتشفت انه له علاقه بحب الشباب ، و في نفس الوقت انزعجت لأن البديل النباتي مو متوفر طول الوقت و أحيان ماعندي وقت فراغ أسويه في البيت .
و امتنعت عن الحليب الحيواني و بعض مشتقاته من الشهر الأول بان الفرق ، الحبوب الحمراء وقفت عن الظهور و كمان نظام العناية اللي كنت ماشية عليها ساعد في تخفيف الآثار .
الآن لي 3 أشهر امتنعت عن الحليب من المصادر الحيوانية و استبدلته بحليب اللوز و بالنسبة للي يقولوا الكالسيوم و بقية المواد المفيدة من وين بتتحصلي عليها فأقوله في خضروات و مأكولات أخرى تحتوي على أضعاف كمية الكالسيوم اللي في الحليب .
النتيجة على بشرتي كانت رائعة ، الحمدلله الحبوب الحمراء ذهبت بلا رجعة الحمدلله الحمدلله ، و بقي آثارها اللي في الخدود مع عنايتي إن شاء الله بتروح .
بصراحة في نوعين تقشير محتارة بينهم و أعراضهم الجانبية قليلة أفكر أسوي واحد فيهم حتى أتخلص من الآثار بسرعة ، لكن أجلت الفكرة للخريف أو الشتاء الجاي كون هذه الفصول أفضل و أريح للي بتسوي تقشير .
الخلاصة يا جميلات 🌹 :
- لاحظي بشرتك من ايش تتأثر ، أكل أو مستحضرات العناية و التجميل أو العطور أو التدخين مو شرط أنتِ أي أحد مدخن و معك باستمرار بيأثر سلباً على بشرتك .
- لا تخوضي علاج في عيادة و انتِ ما ارتحتي للطبيبة أو ماحسيتها فاهمة حالتك ، دوري غيرها .
- التزمي بنظام عناية سهل و في نفس الوقت اختاري منتجات تساعدك في حل مشاكل بشرتك .
روتين عنايتي ببشرتي :
في هذه الفترة ركزت على روتين عنايتي الليلي و خليته هو الأهم ، طبعاً ما أنسى التغذية السليمة و الأمتناع عن الأطعمة اللي تضر البشرة .
فرشة التنظيف من أولاي
فعلياً تنظف البشرة بشكل عميق و تقشرها على خفيف ، و استعملها مع أي غسول .
غسول البشرة
تكلمت عن غسولات البشرة و أنواعها [ هنا ]
حالياً استخدم غسول نورمادريم من فيشي
حتى اللحظة أشوفه جميل جداً و حسن من بشرتي ، لكن مابستعجل في الحكم عليه بستنى فترة و أكتب رأيي عنه بالتفصيل .
كلمحة بسيطة عجبني انه خالي من : "الصابون و البارابين و الكحول ".
أخذته من صيدلية النهدي بـ 116 ريال ، و متوفر أيضاً في الصيدليات الكبرى .
مقشر البشرة
المقشرات اللي استخدمها هذه الفترة هي مقشرات هيمالايا و كتبت عنها نبذة بسيطة في تدوينة المقشرات [ هنا ]
الأكثر استخداما كان مقشر الجوز جميل جداً ، ما استخدمه غير مره وحده بالأسبوع .
و بتكلم مستقبلاً عن مقشرات هيمالايا بالتفصيل إن شاء الله .
الأقنعة
تكلمت عن فوائد الأقنعة و أنواعها [ هنا ] .
استخدم الأقنعة الجاهزة و عندي تشكلية بين الأقنعة المنقية و المنظفة و المهدئة و المقشرة و أعطتني نتيجة جيدة الحمدلله
كل واحد من هذه الأقنعة ما استخدمه غير مره بالأسبوع ، و أحياناً لما أكون مروقة أسوي قناع بنفسي من المكونات المتوفرة بالبيت .
و على فكرة أشوف الأقنعة سوت فرق كبير في نظام عنايتي .
تونر البشرة
بيني و بينكم زمان كنت ما أشوف له فايدة غير تقفيل المسام لكن بعد عدة تجارب ترى التونر له فوائد كبيرة ، لا تستحقرونة و تقللون من قيمته ، تكلمت عن التونر و فوائده [ هنا ] .
حالياً استخدم تونر من نيفيا و هو الأنسب لبشرتي في هذه الفترة .
السيروم
تكلمت عن فوائد السيروم [ هنا ]
حالياً استخدم سيروم أورنج ديلي حتكلم عنه بالتفصيل مستقبلاً .
الترطيب
تكلمت عن ترطيب البشرة و فوائدة [ هنا ]
استخدم كريم أرونج ديلي للتفتيح حتى يساعد في إعادة نضارة البشرة و توحيد لونها و تكلمت عنه [ هنا ]
ذكرت المنتجات اللي استخدمها بالترتيب و أكيد كل وحده منكم لها نظامها الخاص و المناسب لها في العناية ..نتشابه في بعض الخطوات و نختلف في بعضها الآخر .
بالنسبة للعناية الصباحية جداً بسيطة و سريعة .
غسول -> تونر -> ترطيب .
+ واقي شمس اذا كنت بخرج أو اذا بشتغل في البيت في مكان فيه حرارة زي المطبخ .
حلول الطورائ
لو في يوم طلعت لي حبة لئيمة و مو وقتها أحط عليها شوية من زيت شجرة الشاي باستخدام أعواد القطن بيهدئ البشرة و يخفف من الإحمرار و ينشفها .
كمادات البابونج أو موية الورد مفيدة جداً لمثل هذه الحالات .
بكذا أكون تكلمت عن حالة بشرتي و كيف عرفت سبب الحبوب و تخلصت منها .
و نظام عنايتي ببشرتي الحالي .
لو عندكم إضافة أو حابين تشاركوني تجاربكم اكتبوها في التعليقات أو تويتر أو انستقرام .
صفحاتي الإجتماعية في يمين المدونة .
في امان الله
خوفتيني من الحليب ��
ردحذفهالفتره اقول مقصره بالحليب وصرت اشرب كثير عشان الكالسيوم
انا كنت اعاني من حبوب شديده
ومريت بنفس تجربتك مع استنزاف الفلوس في التقشير
وقتها ماكانت عندي خبره وكل تفكيري الدكتوره اخبر مني
وطووولت بالجلسات يوم شفت تحسن وقفتها من كيفي
اوك تحسنت بشرتي لكن بسييييط جدا مقابل طول مده الجلسات
ورجعت بشرتي زي ماكانت
حاليا عالجتها بالروكاتين مع متابعه الدكتور طبعا
الحمد لله لي اكثر من سنه بنتيجه حلوه
بس لازم انتبه من زياده الحليب عشان ماترجع الحبوب
شكرا ع البوست الجميل ������
في مصادر ثانية للكالسيوم غير الحليب زي البروكلي و الخضروات شديدة الخضرة .
حذفو حليب اللوز لذيذ و ماله أي ضرر على البشرة .
ماشاء الله .. ممتاز و حلو إنك حاولتي بكذا طريقة لحد ما وصلتي لـنتيجة مرضية .
اشكرك على ذكر تجربتك .
العفو ياجميلة ❤ 😘
حبيت البوست و بصراحة ماكنت ادري ان الحليب البقري يسبب ظهور الحبوب انا اللي اعرفه انه يسبب مشاكل في الهضم لبعض الناس
ردحذفو منهم انا , يلا معلومة جديدة :)
زيت شجرة الشاي هو اللي شالي الحبوب اللي طلعتلي فجأة استخدمه كتونر مرتين في اليوم و حابته جداً جدااا حالياً مخلص و استخدم قناع شجرة
الشاي بشوف يزيل الكم حبه الباقين ولا لازم الزيت ..
شكراً ع البوست المفيد يا جميلة <3
هلا بالغالية .. نورتي 😘
حذفكنت مثلك مستبعدة الفكرة نهائياً وعلى بالي ما يسبب غير مشاكل الهضم ، لكن مره قريت لدكتور عربي يتكلم عن الجدل اللي صاير بين علاقة الحليب بحب الشباب و كانت خلاصة كلامه مافي علاقة و اضحة ، رغم إنه حرك تساؤلات في رأسي ما تحمست أبحث عن الموضوع بنفسي غير بعد مدة طوويلة ، و بعد التجربة و تركي للحليب من مصدر حيواني شفت الفرق ، الحمدلله ما عاد طلعت لي حبوب مره ثانية و حالياً جالسة أعالج الآثار .
بالفعل زيت شجرة الشاي روووعه و يفك أزمات ، و أغلب مجموعة شجر الشاي تعجبني .
العفو يا جميلة ❤
حبيت البوست .. يعطيك العافيه
ردحذفبالنسبة لزيت شجرة الشاي أنا شريته من موقع ايهرب و جربته أكثر من مره و ما استفدت :/ و وقفت استخدامه
شفت عليه مدح كثيير بس ما ادري انا ما استمريت عليه وقت كافي او ما ناسبني .
كنت استخدمه بنفس طريقتك عود اذان و على مكان الحبوب بس .
الله يعافيك يا جميلة ❤
حذفزيت شجرة الشاي كنت استخدمه مره لمرتين في اليوم يهديء الحبة و يخفف احمرارها .
و خلال ثلاث أيام من الاستخدام تجف الحبة و تبدأ تتقشر و تختفي مع الأيام .
جربي تستخدميه مدة أطول يمكن يكون فيه فرق .
تجربتك جدا مفيييد ، فيه معلومات أول مره اسمع عنها
ردحذففعلاً جسم الانسان مايتغير كذا من كيفه لازم سبب
كثير يتوقعون ان الدكتور أخبر منهم مع ان في حالات كثيره العكس المريض يعرف اكثر
شكراً على البوست المفييييد ..
منورة يا جميلة 😘
حذفالعفو .. يسعدك ربي يا عسل 🌹
حبيت التدوينه , وفعلا قد قريت ان الحليب يسبب حبوب الشباب .
ردحذف❤❤❤
حذفانا انسانه تعاني من حب الشباب من فتره
ردحذفجربت رحت لدكتوره لكن ماقنعتني لانها تعالج سطحي انا ابي علاج سطحي وداخلي مب بس جلسات تقشير
واعطتني حبوب من غيز فحص دم ولا اي شي لكن وقفته من كيفي لأني خفت على نفسي بصراحه
مثل قصتك من اول جلسه حسيت بالفرق واو لكن بعدها مافي اي تقدم
طبعاً صرت اعتني ببشرتي بنفسي وتجيني فتره تختفي الحبوب وافرح الحمدالله لكن منطقة الجبهه الي لحد الآن مافيها تقدم الخدود والذقن الحمدالله لكن الجبهه مازلت اتعب معها
وشكلي حجرب الي تستخدمينهم يمكن ان شالله فيه فرق :(
حالياً اعالج الآثار بالخدود والله يسهل يارب
مع اني انسانه ماتشرب حليب والفاست فود نادر جداً اكله والغازيات والشوكلت وما الى ذلك يعني مادري شالسبب !! واحافظ على اني انظف بشرتي طول اليوم ومالمس وجهي بايدي وكذا :(
حاسه بمعناتك ، ممكن يكون من أنواع ثانية من الأكل غير اللي ذكرتها .
حذفأبحثي في النت عن علاقة الغذاء بحب الشباب .. و ممكن يكون فيه أسباب ثانية ما ذكرتها هنا .
جربي تروحي لدكتورة ثقة ، أكيد بيكون فيه حل .
و كمان العناية بالبشرة بتنظيفها لا تهمليها ، غطاء المخده غيريه كل يوم ، حجابك لازم يكون نظيف .. أي شيء ممكن يلمس الوجة لازم يكون نظيف .
و حطي بالك في مثيرات خارجية للبشرة زي الحر و الغبار و العطور .
و إن شاء توصلي لـ نتيجة كويسة و بشرة بدون مشاكل ❤
انا جتني حب شباب جلست سنتين احاول اعالجها بس مافيه فايده بعدها امي قالت شكله مالك الا الرواكتان استخدمته ٦ شهور طبعًا سلبياته اكثر من الايجابيات و يبيله متابعه شهريه و تحاليل خلصت العلاج صارت بشرتي منوره صااافيه تجنن جلست سنه فرحانه فيها بعدها رجعت من جديد بس اهون من المره الاولى المره الثانيه كانت حبوب صغغااار منتشره بكل وجهي طبعًا رجعت لدكتوره صرفت لي ادويه استخدمتهم بأنتظام مافاد معي قالت الدكتوره مالنا الا الرواكتان رجعت اخذته مره ثانيه و الحين صارلي شهر مخلصه بشرتي للان زينه الحمدالله و ان شاء الله للابد ماترجع انا قبل ماابدا اي علاج كان بوجهي و ظهري اللي بوجهي رجعوا من جديد اما ظهري لا الحمدالله و اذا على الاكل فأحنا بيت صحي مو اي شي يدخل الثلاجه بس اني مدمنه حليب يمكن السبب منه ؟ كنت مدمنه حليب بس الحين باديه اخفف امي تقول يمكن منه خففيه لاني اشرب حليب الطازج اخلص نصه بيوم يلا عاد وش نسوي نقطع كل شي عشان البشره
ردحذفالحمدلله إنك تخلصتِ من مشكلة الحبوب و إن شاء الله ماعاد ترجع أبداً ، و حلو ذكرتي تجربتك مع الرواكتان.
حذفشاكره لك ياجميلة ❤
طيب سؤال : حبيبي انا ما استخدم غسول استخدم صابون نيتروجينا لحب الشباب موجودة في الصيدلية اقدر استخدم غسول و الصابونة و لا واحد منهم و ايش احسن تونر البشره الدهنية انا جريت نيفيا بس زمان و دحين قالولي غارنييه احترت
ردحذفالصابونة أو الغسول كلهم لـنفس الهدف واحد فيهم يكفي .
حذفتونر من مجموعة بيور سيستم من ايف روشيه مرره ممتاز و سعره معقول .. لو عاجبك تبع نيفيا استمري عليه .