السلام عليكم و رحمة الله و بركاته
كيفكم بنات ؟ .. إن شاء الله كلكم بخير ❤
تدوينة اليوم بتكلم فيها عن تجربتي للجل لاينر من انجلوت ، هو عندي من فترة طويلة ما أدري ليه ما أتكلمت عنه من أول !!
المهم أتوقع كثير منكم سامعين عنه و بعضكم أكيد جربتوه .
ما أحب أطول في المقدمات خلونا ندخل في الموضوع و نتكلم عن تجربتي .
كوني جزء من عالمي ~
وصفه و شويه معلومات عنه :
ذا صبغية كثيفة و عالية ، توفر تغطية مثالية و ألوان غنية من تطبيق واحد فقط !
كريمي و ناعم بتركيبة طويلة الثبات ، يجف سريعاً ، مقاوم للتلطخ و التجعد .
هيبوالرجينيك ، مقاوم للماء .
حجمه 5.5 غرام صالح لـ 9 أشهر من تاريخ الفتح .
سعره بـ 85 ريال .
تجربتي و رأيي :
الدرجة اللي عندي هي الأسود و رقمها 77 .
التعليب : بسيط ، علبة دائرية من البلاستيك الزجاجي .
القوام و التركيبة : كريمية ناعمة ، سهلة في المد ماهو من النوع اللي يكلكع أو يعذب في الرسم ، النقطة المهمة إنك تأخذي كمية بسيطة منه على الفرشة .. يجف بسرعة و النهاية له مطفية .
الصبغية : بما أن الدرجة اللي عندي أسود، فأقولك ترى لونها أسود فاحم ، اللي زيي تحب الأسود يكون فاحم بتحب جل لاينر انجلوت .
سهولة الأستخدام : ما اعتبره سهل للمبتدئات لكن مره مرتين تتعودين عليه و يكون سهل ، فيه عيب و نفس الوقت حسنه يجف بسرعه فلازم تكون يدك خفيفة و سريعة بالرسم .
الثبات : جداً ممتاز ، حطيه و أنسي .. أطول مدة حطيته كانت 9 ساعات و ظل زي ماحطيته ماتغير ، استخدمته لداخل العين و كان مررره ممتاز و ثابت .
الإزالة : صعبة حبتين ، ضريبة الثبات.. تحتاجي مزيل قوامه زيتي حتى يزيله بشكل جيد - استخدم للإزلة زبدة البابونج من بودي شوب و تكلمت عنها قبل في تدوينات سابقة - .
رأيي بشكل عام :
من المنتجات اللي حبيتها و كانت تجربة ممتعة ،ماشفت فيه سلبيات مزعجة بالعكس كانت نتيجته جميلة و بالضبط زي ما أحب .
من ناحية هل المنتج جف بعد فترة من الإستخدام ، لا .. ابداً ما صارت معي لأني غالباً أحفظه بشكل مقلوب .
بالنسبة للفرش : جربت كذا نوع و كانت جيدة لكن حبيت الأنواع اللي تكون ريشة نحيفة و كمان حبيت فرشة ريل تكنيك السيليكون .
توضيح للون الدرجة " أسود رقم 77 "
بكذا خلصت تدوينة اليوم ، لو لكم تجارب مع هذا الجل شاركوني فيها .. اكتبوها هنا في التعليقات أو في تويتر أو انستقرام .
صفحاتي الإجتماعية في يمين المدونة
في امان الله
تعليقات
إرسال تعليق