صباح الخير 💐
لي مدة أحاول أستجمع أفكاري و أرجع أدون هنا .
كثير أحب هالنوع من التدوينات ، من خلالها أعرف هل أنا انسانة مكدسة للمنتجات أو العكس .
في التدوينة الأخيرة من هذه السلسلة قلت انه انتهى تكدس المنتجات و كل الموجود عندي هو اللي استخدمه فعلياً
و من هذه التدوينة ببدأ بتقنين المنتجات أكثر .. من قناعتي كل ماكانت منتجات العناية محدودة و مركزة على السبب كل ماكانت أكثر نفع و فائدة لي ، و من الناحية المالية فإن هذا الأسلوب أنفع " لتقيل الهدر المالي " على منتجات ماتستخدم الا كم مره و احتمال كبير ترمي و هي ما انتهت .
حتى لما أشوف ريفيو لبلوقر و أتحمس على المنتج .. صرت أقول لنفسي " وقفي !! أقرئي عن المنتج من مصادر ثانية ، أرجعي لموقع الشركة المنتجة شوفي وصفها للمنتج .. و اذا في فرصة أحصل على عينة للتجربة يكون أفضل "
غالبًا بعض الشركات تعتمد على ضخ منتجاتها لبلوقر و مشاهير كثير و كلهم يتكلموا عنه في وقت واحد ممايسبب لا شعوريًا عند الأغلب رغبة بالشراء و تتكرر مقولة " خليني ألحق عليه قبل مايخلصوه متابعات فلانة "
في أمر آخر مره مزعج
لا أنا و لا أي بلوقر أو مشهورة نعتبر أطباء أو أختصاصين في البشرة ، نحن غير مناسبين لأسئلتكم عن مشاكل بشراتكم أو حلول لها ، كل ريفيو أو تجربة تعتبر خاصة باللي دونتها احتمال نفعها لك مايتجاوز الا معرفتك بالفعالية المحتملة للمنتج أو جديد السوق .. مو هي تقرر أنه ينفع لك !! إلا منتجات العناية استشيري فيها طبيبك قبل استعمالها .
من بداياتي في التدوين و أنا أقول اللي عندها مشكلة جدية تروح لعيادة مضمونة و تعالج نفسها من بدري ، مو تخلي بشرتها محل تجارب و بدل مايكون علاجها يحتاج كم جلسة بتصرفها المتهور تخليه عدة جلسات غير منتهية .
جديًا أتجه نحو تقليل كل التدوينات المتعلقة بالبشرة و منتجاتها ، بمعنى تدوينات العناية الجاهزة راح أنزلها أما شيء جديد ما أفكر أكتب عنه ، ستشهدون تحول و تجديد في مواضيع المدونة .
في سلسلة سابقة كتبتها عن أساسيات العناية تعرفة بمعاني أسماء المنتجات و بعض الفوائدة المتوقعة و الفروقات في الإستخدام
تقدروا توصلوا لها من " هــنــا " و لما تستوعبي المصطلحات و الفروقات تقدري تختاري منتجات عنايتك بنفسك .
خلونا نجي للمنتجات اللي خلصتها هالفترة 😅
شامبو فيتو للشعر المصبوغ
تكلمت عنه في تدوينة العناية بالشعر [ -هـنا- ] .
ما برجع أشتري منه لعدة أسباب ، أول شيء شكل التعليب غير عملي .
عندي شامبو يومي أفضل منه بالنسبة لطبيعة شعري و ينفع للشعر المصبوغ أيضًا .
شامبو آنتي داندروف من فولتن فارما
تكلمت عنه في تدوينة العناية بالشعر و كتبت عنه ريفيو في انستقرام [ هنا ] .
هذا الشامبو هو اللي خلصني من القشرة و الآن استخدمه بشكل أسبوعي
أكيد بكرر شرائة فهو فادني بشكل كبير .
كثير يسألوا كم سعره تقريبًا في حدود الـ 100 ريال و متوفر في صيدليات النهدي ، لو متوفر في مكان ثاني أذكروه في التعليقات .
صبغة شعر من باليت
كان تعجبني و يلا و دائم أشتري منها باك اب ، لكن في يوم كانت درجتي مخلصة و فكرت أجرب شيء جديد
لقيت الدرجة المناسبة في باليت ، و جربتها و أعجبتني جدًا صبغت اللون بشكل ممتاز و لي أكثر من شهر دوبها الجذور تبان .
الحقيقة ماني خبيرة في صبغ الشعر فقط بحدود تجاربي على نفسي .
طبعًا برجع أخذ منها .
مقشر كيور الياباني
تصدقوا أول ماشفت الريفيوز اللي عنه و تجارب المشاهير مافكرت حتى أقرأ عنه ، ما أدري حسيت انه كذبة .
المهم جاني كـعينة مع مشتريات و قلت ليه ما أجربه .
صدقًا حجم العينة مايكون رأي كامل فقط انطباع عام عن المنتج .
تكلمت عنه في انستقرام [--هنا--] .
فعليًا حابه أشتري الحجم الكامل بعد العينة لكن بخلي لحد ما يخلص المقشر تبعي و بعدها أطلبه ، مابستعجل في الشراء .
عينات مختلفة من ديرما اي
تكلمت عنهم في انستقرام [=هنا=] .
هذا الحجم هو الأفضل في عينات المنتجات تجربينه مضبوط و تعرفي لو ينفع لبشرتك أو لا .
ما أفكر اشتريهم أبدًا للأسف مايناسبوا بشرتي .
قناع الطين من بيودرما
من أجمل الأقنعة الطينية اللي جربتها .. هو وقناع الطين بيور سيستم الأفضل لبشرتي .
أكيد بشتري منه .. كتبت عنه من فترة في[ تدوينة سابقة ]
كريم العين من لوريال
تكلمت عنه في [ آخر تدوينة ]
الكريم حلو كترطيب لكن ما أتوقع أرجع اشتريه مره ثانية ، جربت أنواع أفضل منه .
ممكن يكون خيار إضافي لو مالقيت منتجاتي المفضلة .
كريم و مقشر العناية بالقدمين من VLCC
فعالية المنتجين جيدة لكن ما برجع اشتريهم .
السبب إنها تعتمد على مكونات كيميائية ، و لو لقيت منتجاتي المعتادة كان ما اشتريت هالمنتجتين .
بلسم الترطيب من ايف روشيه
من منتجات الترطيب المفضلة هو و الزبدة ، لكن هالبلسم تفوق عليها حلو لترطيب الجسم و خصوصًا الأيدي و الأرجل
أكيد عندي منه احتياط قبل مايخلص .
مناديل طهارة
هالمناديل حلت لي مشكلة ، ريحتها جميلة و لطيفة على البشرة ، عندي منها احتياط كم علبة ما أقدر استغني عنها .
بالعادة المكياج ما أكرر شراء نفس المنتج ممكن ألقى شيء من ماركة ثانية أجود منه و أشتريه .
و كمان المكياج مايخلص بسرعة يعتمد على مدى استهلاكك ، أمنيتي لو يكون فيه أحجام صغيرة من كل حاجة أريح 😌✨
بيس و ستروب كريم من ماك
كمية هالعينات وفيرة و جربتهم بشكل كويس ، أعجبني الستروب كريم و اشتريت منه الحجم الكامل .
كحل ميبلين الكريمي
ما أدري له كم سنة عندي و كرفته بالإستخدام مع ذلك ما خلص لسى باقي فيه .
اللي عندي الدرجة البنية مرره أحبها .
مابرجع أشتريه لأنه عندي كحل بني يفي بالغرض .
ماسكرا ماك Zoom fast black lash
بالطبع أتوقع اشتريها بعد ما أخلص ماسكراتي اللي ما انفتحت لسى 🤣🤣
كحل نكس البني
هالنوع من أكحال نكس ممتاز سبق و تكلمت عنه هنــا .
لكن مابرجع اشتريه و موجود عندي كحل بني .
كحل بني من ماكس فاكتور
ملاحظين عندي ادمان لللأكحال البنية 😅 ، أشوفها أجمل و تعطي بعد طبيعي للعين 💕
بتكلم عنها قريباً إن شاء الله ، و هذا هو الوحيد اللي رجعت اشتريت منه و هو كحلي البني الحالي .
الكحل السائل من رين أوف فاي
أعجبني كثير 💕💕 و كتبت عنه سابقًا هنا .
قررت أرجع اشتريه ، لكن المشكلة هو وصلني في الماجيك بوكس من فانيلا و لي مدة أدوره في الموقع و مو متوفر .
فأي وحده تعرف مواقع توفر منتجات رين أوف فاي تكتب في التعليقات أو في حساباتي في انستقرام و تويتر .
بودرة الخدود من ديبورا
من منتجات المكياج اللي خرجتها في التنظيف لها سنوات عندي و ماينفع أكمل استخدامها بالإضافة علبتها انكسرت و ممكن تتلوث بسهولة .
من أروع أنواع البودر رجعت للمحل بشتري منها لكن للأسف مالقيت الدرجة و الدرجات الثانية ماعجبتني .
حاطتها في بالي لو اشوفها مره ثانية بشتريها .
منظفات ماك للمكياج
من المنتجات اللي ماعجبتني لنوع بشرتي ، لكن فاعليتها حلوه
روج نكس المطفي
هالدرجة الحمراء عجيبة ماتوقعت اتقبلها علي خصوصا إني أميل للدرجات اللحمية أكثر .
المشكلة في هالروج من يوم اشتريته و هو فيه ريحه غير مقبولة ، و مع الأيام ألاحظها تزيد فرميته في الدرج و نسيته ، و لما جيت أنظف و أرتب مكياجي لقيته و أقول في بالي المفروض مرمي من زمان .
تكلمت عنه سابقًا ، مابرجع اشتريه عندي اكتفاء من الأرواج .
و أخيراً انتهيت من تدوينة اليوم
شاركوني رأيكم يا حلوات
في امان الله
أزال المؤلف هذا التعليق.
ردحذفمنتجات VLCC دايم امر جنبها ودي اجيبها بس اخاف اتوهق فيها وما تطلع حلوة.
ردحذفجل لاينر ميبيلين جدا جدا جميل فيه بركة يالله يخلص 😻 ❤️.
ارواج نيكس جداً جميلة هالنوع أدمنته، غريبة الريحة اللي تقولين عنها ممكن يكون سوء تخزين من عندهم.
يعطيك العافية يا جميلة ❤
ممكن سوء التخزين هذا اللي كنت أفكر فيه .
حذفالله يعافيك 💖
حبيت التدوينه سلوى , نفس النظام قررت اني اقلل استخدام لمنتجات العنايه .. كثره استخدام المنتجات ما حسستني بفائدة بس طوًلت روتيني و تعبت نفسي .. ودي اجرب ماسك بايوديرما يناسب البشرة المختلطة ؟
ردحذفجربت كريم الجه جداً عاجبني فبجرب الماسك
مناسب للمختلطة لكن لا تحطيه على الأجزاء الجافة .
حذف