صباح الخير
لاحظت إنه من فترة ما تكلمت عن أي منتج مكياج و الحقيقة إنه في الفترة الماضي جربت منتجات جديدة علي من كذا براند
و بما إنه مجموعة المنتجات تعتبر كبيرة على تدوينة واحدة قررت تكون سلسلة من عدة تدوينات و كل يوم أتكلم عن مجموعة منتجات من براند معين .
بهالطريقة تكون مرتبة كمرجع و سهولة الوصول لها في نتائج البحث .
تعرفوا لما رتبت المنتجات كل براند لوحدها انصدمت من كمية براند معينة كانت الغالبة ماتوقعتها أبدًا
راح تكتشفوها في التدوينات القادمة إن شاء الله
اليوم بتكلم عن منتجات الهاي اند و المنتجات المتوسطة اللي تحتاج ميزانية
ممكن لاحظتوا إن أغلب مشترياتي من الهاي اند تكون فاونديشن .. برايمر .. كونسيلر .. كل المنتجات المندرجة تحت هالنوع
ببساطة هي اللي ألقى درجتي فيها بالضبط و يكون ثباتها أعلى ، أما الدرقستور لحد اللحظة مالقيت أساس بالضبط بالضبط نفس درجتي لازم تعديلات معه و أشوفها خسارة علي و هدر في ميزانيتي ، في كل مرة أشتري أساس ممكن أشتري درجتين مختلفة و إلا أرجع أشتري من براند ثانية !! فتخيلوا يوم قارنت الصرف اللي صار بين الدرقستور و الهاي آند شفت إني تجاوزت مبلغ أساس من الهاي آند فبديهي أتوجه للهاي آند براند في هذا النوع من المنتجات و أريح ميزانيتي من " الهدر" .
كونسيلر دبل وير من استي لودر | Double Wear Stay-in-Place Flawless Wear Concealer
من فترة طويلة تكلمت عن أساس استي لودر [ هنا ] ، و كيف إنه أفضل أساس في نظري للمناسبات المهمة و الطويلة و مازال .
لكن هالفترة بديت أميل لـ الأساسات الفلوليس ذات التركيبة الخفيفة على البشرة و جدًيا أدور أساس بنفس قوة ثبات استي لودر لكن يكون فلوليس أكثر .
في بداية 2017 بديت استخدم كونسيلر استي لودر أتذكر كانت درجاته المتوفرة محدودة في دبنهامز مالقيت الا كم درجة .
اخترت من الدرجات الباردة حتى تساعدني في التغلب على الهالات بدون مصحح ، و بالفعل نفعت الطريقة لكن أحيانًا أحتاج للمصحح معه .
الثبات عالي و يناسب البشرات الدهنية أكثر - مذكور إنه ينفع لكل البشرات مع ذلك ما أنصح فيه لـ صاحبات البشرات الجافة و لو عندكم نية تجربوه لازم ترطيب أو برايمر مرطب حتى مايخطط معك أو يظهر بمظهر ناشف -
من ناحية التوزيع و الدمج مرره سهل لكن ألحقيه قبل لايجف لأنه فعليًا ما يتحرك من مكانه
الفينيش له طبيعي مطفي .. الحلو فيه مقاومة للرطوبة - خياري الأول في يوم العيد " ايوا احنا من الناس اللي تطلع تعيد الصباح " -
نسيت أذكر بعض المعلومات :
يعتبر خالي من الزيوت - مختبر طبيًا " العيون و الجلدية " .
لا يسد المسام و يعتبر ( NON-ACNEGENIC ) = بمعنى لا يتسبب في إنتاج أو زيادة حب الشباب .
خالي من الروائح العطرية .
نصيحة صغيرة : منتجات الدبل وير ما تنفع كإستخدام يومي أو للدوام ، صحيح ثباتها عالي لكن تحتاج تنظيف عميق و ممكن تكرار التنظيف العميق كل يوم يسبب تهيج و تعب البشرة فالأفضل تكون للمناسبات و السهرات .
أفتكر سعره كان بـ 150 ريال و استي لودر متوفر في دبنهامز و سيفورا و باريس غاليري و وجوه و بعض المواقع اونلاين زي أناس و نمشي .
ستروب كريم | Strobe Cream
من المنتجات اللي و لا 1% فكرت أجربها ، كنت أقول ليه البنات هابين فيه !!
أول تجربة له كانت سامبلز و تكلمت عنه في انستجرام .
و من فترة أشتريت الحجم الكامل بدرجة " Goldlite "
فكرته : مرطب بلمعة يعزز الإشراقة لـ البشرة الباهتة و يساعدها على التألق .
عجبني فيه نقطة التألق و الإنعكاس الناعم اللي يعطيه لما تتعرض البشرة للضوء ، كنت أخلطه مع الأساس - أغلب أساستي مطفية - و يعطي لوك طبيعي ساتان جميل جدًا .
و أحيان أحطه كبرايمر على أماكن الإضاءة في الوجة يعزز من قوة الإضاءة اللي أستخدمها فوقه .
هل الـ ستروب كريم لازم يكون عند كل بنت ؟!
لا مو ضروري .. راجع لكل وحده و تفضيلاتها في المكياج لكن أنصح الي مخططة تجربه تأخذ عينة و تجربه قبل الشراء .
ماسكارا زوم فاست بلاك لاش | ZOOM FAST BLACK LASH
أول ماسكارا أجربها من ماك و كانت جميلة جدًا
لكن في البداية كانت تلصق الرموش في بعض ، فتركتها أسبوعين و رجعت استخدمها .
الحلو فيها إنها تعكف رموشي بشكل ممتاز .. ما أحتاج لعكافة الرموش قبلها .
تعطي حجم حلو للرموش من ناحية التطويل ما حسيتها تطول كثر ما تبرز طول و حجم رموشك .
لون سوادها فاحم و ثباتها ممتاز
لي مدة أحاول أطلبها من الموقع لكنها مخلصة و ما أدري لو متوفرة في المحلات .. الله يعين شكلي بزورالفروع و أدورها .. ياحلو التسوق اونلاين تجيك و أنتِ بالبيت
برايمر بوشن من اربن ديكاي | Urban Decay Eyeshadow Primer Potion
درجتي المفضلة فيه هي "Original "
تكلمت عنه في تدوينة قديمة بشكل مرة مختصر ، فعليًا ما أستخدمت برايمر لـ الظلال أفضل منه .
يجي بلون لكن بمجرد توزيعه و دمجه مع البشرة يصير شفاف .
الحلو فيه : ثباته الطويل + مايخطط أبدًا و هذه الميزة تخليني أرجع اشتريه كل مره .
فيه منه درجات مختلفة و تنفع لإستخدمات أخرى .. تعجبني منها درجة إيدن " Eden " كونها بلون البشرة و تساعد في توحيد الجفن و تنفع لإبراز الظلال الفاتحة .
لكن الـ Original هي الأفضل لكل إستخداماتي .
بكذا خلصت المنتجات اللي بتكلم عنها اليوم
و شاركوني رأيكم و تجاربكم مع المنتجات اللي ذكرتها
هل تأيدوا فكرة إنه بعض منتجات الهاي اند صعب العثور على منتجات بديلة لها بجودة ممتازة و سعر أوفر ؟!
في أمان الله
صادقة بكلامك عن تكلفة الدرقستور دايم درجات الفاونديشن تصير على وردي حتى لو اخذت اندرتون اصفر مب تصفر بما فيه الكفاية للاسف 😅
ردحذفوعير كذا اسعارهم جدا غالية مقارنة بامريكا بعضه ضعف السعر يقهرون لو يحطونه بسعره الاصلي كان خميت منه 😂😂 + الماسكرا دايم تصير احلى اذا نشفت شوي 😚
الهاي اند للحين ماجربت الا كونسيلر وشادوات ميكب فورايفر وبرايمر بورفيشينال لكن دايم فيه اشياء مغرية الى الان اشوف نفسي ناجحة في مقاومة هذا الاغراء ومحتفظة بفلوسي لكن الله اعلم بتستمر المقاومة ولالا هههههههههههههههههههه
سكرا سلوى تدوينة خفيفة وممتعة كالعادة 🌹❤
العفو منيرة 💖
حذفصح أغلب المحلات هنا مبالغة في الأسعار و الحل في التسوق اونلاين 👍🏼 يوفر علينا 💰 و لازم نقاوم و مانشتري الا اللي فعلًا نستخدمه 😅🤣🤣💔