السلام عليكم و رحمة الله و بركاته
كيفكم اليوم ؟.. إن شاء الله كلكم بخير ❤
اليوم حتكلم عن منتجات خلصتها في الفترة الماضية ، بعضها أعجبني و ممكن أرجع أشتريه و بعضها لا ..
و متابعاتي بصمت تفرحوني لما تشتركوا في المدونة و القائمة البريدية:)
مناديل منعشة للتنظيف من نيفيا
هذه المناديل أحبها و مناسبة لبشرتي و مفضلة عندي على الدوام ، رغم إني جربت أنواع ثانية من شركات مختلفة لكن أرجع اشتري هذه المناديل .
اللي عجبني فيها إنها ماتنشف وجهي بعد استعمالها بالعكس تعطيني شعور بالترطيب .
طبعاً مناديل إزالة المكياج غير كافية لإزالة المكياج " شخصياً أستخدمها كخطوة أولى لإزالة المكياج ".
سعرها حوالي 24 ريال ممكن تكون أكثر ممكن تكون أقل .
متوفرة في الصيدليات و السوبرماركت و أي مكان يبيع منتجات نيفيا .
قطن مربعات من سيبتونا [ Septona ]
بصراحة أقدر أقول أخيراً جربت قطن ممتاز و سعره رخيص .
من الأشياء اللي عجبتني فيه إن قطعة القطن كافية أمسح فيها كل مكياج الوجة ، و القطنة لطيفة على البشرة و ما تنفش أو تطلع خطوط .
تكلمت عنه قبل في انستقرام .
سعره حوالي 10 ريال متوفر في الصيدليات و السوبرماركت .
مناديل ديتول المضادة للبكتيريا
هذه دايم أرجع اشتريها ، الحجم الصغير أخذه مع في الشنطة .
ميزتها اللي تخليني أرجع اشتريها بإستمرار إنها خالية من الكحول ، عموما ما أستغني عنها في التعقيم للأسطح و الأدوات سواء كنت في البيت أو خارجه .
ما أتذكر سعرها ، متوفره في السوبرماركت و الصيدليات .
زبدة الكاكاو من بالمرز
هذه الزبدة أفضلها لترطيب الأماكن الجافة أو المعرضة للإحتكاك ، طبعا قبل ما تخلص لازم أكون اشتريت وحده ثانية .
سعر العلبة الصغيرة حوالي 24 ريال .
متوفره في الصيدليات و السوبرماركت و العطاره و محلات التجميل الصغيرة .
لوشن الجسم من نيفيا للبشرة الجافة
هذا اللوشن صديقي في الشتوية ما أستغني عنه ، حاليا مابرجع اشتريه بخلص اللوشنات اللي عندي و حابه أجرب أنواع جديدة .
ما أتذكر كم سعره ، متوفر في الصيدليات و السوبرماركت و كل مكان يوفر منتجات نيفيا .
لوشن تدليك لعلامات التمدد من بالمرز
ماصدقت أخلصه ، لما تسوي رياضة وزنك ممكن يتغير أو لما ينشد ممكن تظهر لك خطوط فالأفضل تدوري منتجات بنفس فكرة هذا اللوشن أو تعتمدي على زبدة الكاكاو أو زبدة الشيا في الترطيب حتى تتفادي ظهور الخطوط و تحافظي على مظهر جلدك صحي و نضر .
عموما هذا اللوشن أكثر شيء يزعجني فيه ريحته لذلك ماراح اشتريه مره ثانية .
سعره حوالي 30 ريال و متوفر في السوبرماركت و الصيدليات .
زبدة الجسم بزيت الأرجان من بودي شوب
الزبدة من ناحية الترطيب ممتازة و حبيتها .
بالنسبة لريحتها أشوفها عادية لكن عندي بالبيت في كم شخص ماعجبتهم ريحتها فالأفضل قبل ماتشتريها شمي ريحتها .
ممكن ارجع اشتريها لكن حابه أجرب أنواع ثانية من زبدات بودي شوب .
سعرها بـ 75 ريال .
صنفرة بالمشمش من شفا
منتجات شفا صناعة تركية و أسعارها رخيصة مثلاً هذا المقشر سعته 300 مل و سعره حوالي 8~10 ريال .
هذه الصنفرة على أساس إنها للوجة لكن مستحيل استخدمها لوجهي فخليتها للجسم .
عجبتني بصراحة تنظيف و ترطيب و الجسم بعدها ناعم .
عندي منها نوع ثاني حاليا ، متوفره في محلات التجميل الصغيرة و العطاره .
ملح الحليب يوكو سبا
تقريبا جربت كل أنواعه و أحب النوع اللي بالبابايا أكثر شيء ، سعره أقل من 10 ريال مو متذكره كم .
رغم إني احب تنظيفه للبشرة و نتائجة ما أتوقع اشتريه مره ثانية بسبب وجود مكونين ممكن تأثر سلباً على البشرة مستقبلاً ، و أنا حاليا أحاول أبتعد عن المنتجات اللي فيها مركبات تضر البشرة و أدور بديل أفضل ، تكلمت عن المكونات الضاره في آخر هذه التدوينة => [ ❤ ] .
كريم صنفرة من كاب
المنتج حلو و ينظف البشرة ، لكن مو قد مبالغات البنات اللي بكلامهم مخلين منه منتج سحري .
ما أتوقع ارجع اشتريه حاليا حابه أجرب منتجات ثانية
سعره حوالي 40 ريال ، و متوفره في السوبرماركت و محلات التجميل و العطاره .
قناع مقشر بالعسل و الشوفان من بودي شوب
تكلمت عنه بالتفصيل هنا .
حاليا بشرتي ماتحتاج لهذا النوع من الأقنعه فما راح أشتريه .
منظف البشرة من أولاي
جاني عينة مع جهاز التنظيف ، و بصراحة أعجبني و بشتريه إن شاء الله لكن بخلص الغسولات اللي عندي أول .
غسول منعش للوجة بالأترج و العسل من هيمالايا
تكلمت عنه هنا .
هذا الغسول جمااال أكثر غسول ناسب بشرتي ، ماراح أرجع اشتريه هالفترة ، أبغى أخلص كل الغسولات اللي عندي أول .
لاصق الكولاجين لإزالة التجاعيد تحت العين
تكلمت عنه بانستقرام .
عموما ما استفدت منه غير الترطيب و هذه النتيجة أقدر أوصل لها بكمادات الشاهي و موية الورد .
ما أتوقع أرجع اشتريها .
سعرها 10 ريال ، متوفره في السوبرماركت و محلات التجميل العادية .
الكريم الليلي من بوندس Flawless White
تكلمت عنه هنا .
مابرجع اشتريه في كم كريم مخططه أجربهم .
كريم Ageless Total Repair
هذا الكريم وصفته لي الدكتورة لما كنت أراجعها .
هو يساعد البشرة على التجديد و الإصلاح طبعا كنت استخدمه في نفس الفترة اللي كنت اسوي فيها جلسات علاج لبشرتي في العيادة ، له محاذير كثيرة في الاستخدام .. ماصدقت اخلصه كنت أكره ريحته .
سعره 265 ريال و أخذته من نفس صيدلية المستوصف .
طبعا ما أحتاجه و لا راح أرجع اشتريه .
مزيل الرائحة من بيزلين
هذه يزيل رائحة العرق فقط ، جميل و مريح في الإستخدام .
أفكر أجرب غيره فما راح اشتريه هالفترة .
أظن سعره 55 ريال و يمكن زاد ما أدري كم بالضبط .
متوفر في الصيدليات و السوبرماركت .
فايجون مزيل طلاء الإظافر
ميزته خالي من الاستون و ماينشف الظفر ، و إزالتة للمناكير جيدة .
سعره أقل من 15 ريال .
أكيد برجع اشتريه .
بينفت ذير ريل بوش اب لاينر
تكلمت عنه هنا .
أنا من الناس اللي عجبني و مخططه اشتريه مستقبلاً لكن في بالي كم جل لاينر حابه اجربهم أول .
بكذا خلصت تدوينة اليوم ، لو جربتوا شيء منها شاركوني تجاربكم في التعليقات .
صفحاتي الإجتماعية في يمين المدونة
في امان الله
حبيت التدوينة و حبيت انك اتكلمتي عن منتجات متوفره بكل مكان
ردحذفكم منتج عجبني كلامك عنهم و ناويه أجربهم بالذات مزيل طلاء الأظافر شفته في النهدي قبل اسبوع تقريباً بس ما فكرت آخذه
لأن كان عندي واحد لكنه سيء جداً ينشف ظفري بشكل فضييع ! فشكلي بغير لذا ..
شكراً ع البوست الحلو يا قمر :*
العفو حبيبتي ❤
حذف