السلام عليكم و رحمة الله و بركاته
كيفكم بنات ؟ .. إن شاء الله كلكم بخير
اليوم حبيت أكتب عن فرش المكياج بشكل عام و الفروقات بينها .
بشكل عام اسم الماركة مايهم قد مايهمك تعرفي نوع الشعر و الإستخدام للفرشة .
ممكن تلقي في المحلات فرش ماركتها غير معروفة مع ذلك نتائجها ممتازة ، و ممكن تكون هناك فرش ماتتوفر إلا أون لاين أو توفرها نادر لكن تكون مخيبة للأمآل .
و كمان مو ضروري كل نوع فرش موجود في الحياة تضميه لمجموعتك ، ركزي على اللي يفيدك في الإستخدام و لا تشتري لمجرد الشراء .
كوني جزء من عالمي ~
في أشياء لازم تلاحظيها في فرش المكياج قبل ما تختاري :
- نوع الشعر : من الشعر الصناعي إلى الطبيعي كلها جيدة لكن تفرق في نوع الفرشة و الإستخدام .
- كثافة شعر الفرشة : الكثافة تفرق على حسب الإستخدام ، فرش الأساس تختلف كثافتها عن فرشة البلش عن فرشة الآيلاينر .
- قصة طرف الفرشة : هذه النقطة تهم في سهولة الإستخدام ، زي الفرشة المائلة تسهل الإستخدام لتعبئة الحواجب أو رسم الآيلاينر ، الفرش المدببة تنفع للدمج و التحديد ، و غيرها من القصات المختلفة اللي تسهل استخدامات أخرى .
- مسكة الفرشة : بالنسبة لي ما أحسها مهمة جداً ، لكن البعض يهتم لها .. شخصياً أفضل المصنوعة من مكون خفيف سواء كانت معدن أو بلاستيك أو خشب خفيف .. حتى أضمن سهولة الحمل و التحكم فيها .
- الإستخدام : كل ماكانت الفرشة متعددة الإستخدام كل ماكان أفضل لصاحبات الميزانيات المحدودة و المبتدئات ، و شخصياً أفضل الفرش متعددة الإستخدام .. عموماً من ناحية نوع الشعر المستخدم فيها و كثافته يحدد لك ماهية الإستخدامات الممكنة لها .
الآن بتكلم عن أنواع الفرش من ناحية المسميات و ايش الملاحظ على تكوينها :
1- فرش الكابوكي | KabuKi Brushes
هذا النوع من الفرش يتميز بكثافة شعيراته ، و نوع الشعر المستخدم في صناعتها غالباً صناعي - معظم الفرش الدارجة في السوق مصنوعة من شعر صناعي ، فرش الشعر الطبيعي غالية حبتين - ، قصة طرف الفرشة يختلف مابين المسطح و المدور و المدبب و المشطوفة و ممكن تشوفوا أشكال كثيرة و غريبة .
** ملاحظة : فرشة الكابوكي كانت تطلق على نوع و شكل معين من الفرش ، أما في زمناً الحالي صارت لها أنواع و أشكال كثيرة **
استخدامات فرش الكابوكي متنوعة لكن غالباً تنحصر بمكياج الوجة زي فرش وضع الأساس ، الكونسيلر ، الكونتور ، البلش ، البودر .
ليه فرش الكابوكي غالباً تستخدم لمكياج الوجة ؟!!
كثافة شعيراتها تساعد على إعطاء تغطية طبيعية و متساوية للبشرة ، أيضاً نوع الشعر المستخدم في تصنيعها مثالي مع مستحضرات الوجة بشكل عام .. خصوصاً السائلة و الكريمية .
الفرش اللي في الصورة تكلمت عنها قبل [ فرش سنسي ] .
2- الفرش ثنائية الألياف | Duo Fiber Brushes
هذا النوع من الأنواع الجميلة و اللي حبيت نتيجتها فعلياً .. ماحصل لي غير أجرب فرشة وحده من هالنوع و جدياً مخططة على كم فرشة أثارت فضولي وحابه أجربها مستقبلاً .
هذا النوع من الفرش لما تطالعي فيه يعطيك تصور إنه كثافة الشعر عادية و كأن بينه فراغات ، لكن على العكس هالفرش تعتبر كثيفة لكن الفرق في أطوال شعراتها ، تتميز إنه تحتوي على طولين مختلفين من الشعيرات و غالباً هالنوع من الفرش تجي فيه الشعرات الطويلة باللون الأبيض و القصيرة باللون الأسود.
طيب ايش فايدة إختلاف الأطوال ؟!
الشعرات الطويلة هي اللي تأخذ المنتج و الشعرات القصيرة تساعد في الدمج بشكل مكثف و أفضل .
تعجبني في دقة توزيعها للمنتج و النتيجة الطبيعية اللي أحصل عليها.
أستخدامتها مع معظم المستحضرات سائلة ، كريمية ، بودر .
شخصياً أشوفها من الفرش العملية لكذا إستخدام .
3- فرش الباودر | Powder Brushes
هنا أقصد كل الفرش اللي غالباً ماتنفع غير للمنتجات البودرية .
مهما كانت كثافة شعر الفرشة تشوفي شكلها منفوش- يعني مو مضمومه لبعض كل شعره أخذه حريتها - و شعراتها أطول زي فرش الدمج و البودر و بعض فرش الإضاءة .
قصة الطرف لها مختلفة مابين المدببة و المدورة و المائلة على حسب تخصص الإستخدام أو الغرض منه .
فائدة إنه شعرات هالنوع منفوشة حتى تعطي دمج أفضل و طبيعي لمستحضرات البودر سواء كانت ظلال أو بودرة خدود أو برونز .
الفرش اللي في الصورة [ فرش مكياجي ] ، فرشة الـ Contour brush من Real techniques تنفع للبودر و الكريمي وهذه ميزة في كل فرش ريل تكنيك تكلمت عنها [ هنا ] .
4- الفرش المتخصصة .
هذا النوع يندرج تحته كل الفرش المتخصصة زي فرش الظلال ، الآيلاينر ، الحواجب ، الأرواج ... و غيرها .
الكثافة و نوع الشعر و قصة الطرف تختلف بحسب إختلاف تخصص الإستخدام .
ممكن هالنوعية تسبب لكم حيرة في الإختيار لوجود أشكال كثيرة و متعددة للإستخدام .
ما أنكر أول مابديت أتعلم لمكياج العيون ، كنت أبغى أشتري كل فرشة أسمع عنها .. الحمدلله ما اتهورت لأن الكثير منها ماكان ضروري ..
ما بتكلم عن هذا النوع من الفرش ، لأنه له أنواع كثيرة و لو كتبت عنها بتطول التدوينة و ممكن تصير مملة للبعض - لو حابين أتكلم عنها في تدوينة منفصلة اكتبوا لي - .
5- الإسفنجة | Makeup Sponge
صح ماهي من الفرش لكن أشوف مافي مشكلة لو أتكلمت عنها هنا .
بتكلم عن النوع اللي يستخدم رطب أو جاف زي إسفنجة ريل تكنيك .
أشوفها شيء مهم في أدوات المكياج ، توزع الأساس و تدمجه و نفس الشيء للكونسيلر .
تقدري توزعي فيها البرونز .. الكونتور .. البلش .. البودر ... يعني مكياج الوجة بشكل عام .
كمان لو بعد ماخلصتي مكياجك وكان مو مدموج كويس ، طبطبي عليه بالإسفنجة و بيصير مضبوط .
* في بنات يقولوا إنها تشفط الأساس شفط .. جربوها و هي جافة بتعطي نتيجة أحلى مع المستحضرات السائلة .
و لتثبيت الكونسيلر تحت العين حطي البودر بالإسفنجة و هي رطبة بيطلع تماام .
بكذا خلصت تدوينة اليوم و أعطيتكم خلاصة تجاربي مع فرش المكياج ، لو حابين أكتب عن الفرش الأساسية المهمة لكل بنت اكتبوا لي في التعليقات أو تويتر أو انستقرام .
صفحاتي الإجتماعية في يمين المدونة .
للتواصل : salwasblog@hotmail.com
في امان الله
ال Stippling brush تجربتي معاها سيئه ما ضبطت معاي ب ولا استخدام
ردحذفباقي اجربها بالبلشرات الكريميه ك آخر فرصه لها معاي ><
حبيت البوست مرتب .. يعطيج العافيه
لاحظت إنه أفضل طريقة في إستخدامها تكون بحركات دائرية أو تبدئي بالطبطبة و تدمجي بحركات دائرية .. تعطي مظهر و لمسة طبيعية للبشرة .
حذفحبيبتي إنتِ 😘
الله يعافيك ❤