السلام عليكم و رحمة الله و بركاته
كيفكم بنات ؟ .. إن شاء كلكم بخير و صحة يارب 😘
تدوينة اليوم عن منتجات خلصتها ، و بصراحة حتكون طويلة فجهزي لك كوب شاي/ قهوة و روقي عليها .
كمية المنتجات اللي خلصتها في الكم شهر اللي راحت كانت جيدة و بدت أدراجي تترتب أكثر خصوصاً إني صرت منظمة عملية الشراء أكثر ، فعلياً موقفة الشراء إلا للمنتجات الضرورية أما المنتجات الجديدة و اللي حابه أجربها ما اشتريها إلا لو خلصت كم شيء من المنتجات اللي عندي و بصراحة ارتحت كثير على هالطريقة مافي تكدس أو منتجات كثير مفتوحة ، صارت كلها على القد و هذا أفضل شيء .
للبنات الجدد تقدري توصلي لتدوينات هالسلسلة من [ هنا ] .
كوني جزء من عالمي ~
خلونا نبدأ مع المنتجات
من اليمين :
سيروم لوريال الفيف سموث انتنس انتي فريز | L'oreal Elvive Smooth Intense Anti-Frizz Serum
هذا السيروم مهمته الأساسية يهديء من النفشة و الشكل المكهرب للشعر ، يعطي مظهر صحي للشعر و يساعد في الحماية من تأثير أجهزة التصفيف على الشعر .
من سنوات و أنا استخدمته ، يناسب طبيعة شعري و أعطاني نتائج كويسه ، تكلمت عنه في انستقرام .
سعره في الـ 30 ريال .
قناع منعم مع السيروم لوريال الفيف سموث انتنس | L'oreal Elvive Smooth Intense Smooting Mask With Serum
مفعوله مركز لذلك ما أستخدمه غير مره إلى مرتين في الشهر ، كميته كبيرة و يطول عندي .
يعطي الشعر لمعة و نعومة و بالتالي يسهل تسريحه ، أيضاً يحتوي على عامل حماية من الحرارة و يخفف من نفشة الشعر .
نصيحة : لاتقربيه من الجذور أو الفروة " خصوصاً للي تعاني من الفروة الدهنية " .
سعره ما أتذكر كم بالضبط لكن حوالي الـ 30 ريال .
بشكل عام مجموعة L'oreal Elvive Smooth Intense حلوة للشعر الجاف و المجهد و ميزتها إنه في من مكوناتها زيت الأرجان و تحتوي على عامل حماية من حرارة أجهزة التصفيف ، جربت المجموعة كاملة قبل ثلاث أو أربع سنوات و ناسبت طبيعة شعري و مازلت حتى الآن أرجع أخذ منها رغم إني جربت ماركات مختلفة .. لكن ظلت هالمجموعة أنسب حاجة جربتها لشعري .
اقترحوا علي من تجاربكم مجموعات حبيتوها للشعر الجاف أو المجهد ، أبغى أجرب حاجة جديدة و كويسة .
رغوة لتموجات الشعر من و يلا | Wella New wave Twist It Curl Mousse
هذه عاد من جمالها علقت عليها سنين ، لما يقولون لك توضح تموجات الشعر و تجعله مليء بالحيوية هذه هو الحاصل هنا 100%
المزايا الحلوة فيها : حماية ضد حرارة أجهزة التصفيف ، لما استخدمها مع الفير تحافظ على ثبات لفة الخصلة ، خفيفة الوزن ماتحسي أي احساس مزعج على شعرك ، و تقاوم الرطوبة .
أكيد برجع أشتريها من حبي و نتايجها الحلوة ، إلا إذا عندكم اقتراح لشيء جميل يستحق التجربة اكتبوه لي في التعليقات .
سعرها ما أتذكر بكم لكنها أكيد أقل من الـ 50 ريال .
على جنب : ايش رأيكم في مجموعات ويلا للشعر ؟ تستاهل التجربة و الا حكي فاضي ؟!! - عندي فضول أجربها p: -
بديل الزيت المغذي للشعر الجاف من لوريال | L'oreal Elvive Extraordinary Oil Nourishing Oil Replacement
ما أتخيلته بهذا الجمال ، صدق و الله .. كنت معطيه كل منتج يحمل جملة "بديل الزيت " أكبر تطنيش في الحياة ، ايش السبب ما أدري !! ، تقريباً أتوقع راجع لي بعدم تقبل منتج بهالفكرة .
المهم بديل الزيت هذا له عدة استخدمات قبل الإستحمام ، و بعده ، و قبل التسريح .. أنا استخدمته بعد الإستحمام .
النتايج اللي شفتها لمعة طبيعة و نعومة و كمان في حماية من حرارة أجهزة التصفيف .
أخذ منه مقدار حبة الحمص و أوزعه على كمال شعري أبدأ من الأطراف و هي اللي أركز عليها و صولاً للأعلى الشعر .
ما أحطه منه على الفروة بتاتاً لأنها دهنية و ممكن تسبب لي قشرة لو حطيت .
كمية المنتج كبيرة " 300 مل " و طول معي .
طبعاً أشترت منه جديد ، سعره بـ 9.50 ريال .
بالمناسبة لو حابين أكتب عن طريقتي الحالية في العناية بشعري اكتبوا لي في التعليقات أو في الحسابات اللي تتابعوني فيها .
كريم بيبانثين | Cream Bepanthen
تكلمت عنه كذا مره و اعتبره من المنتجات الضرورية و المهمة عندي ، هو كريم مرطب يحمي و يعالج الجلد الجاف و المتضرر و يعالج أماكن الإتكائات ، الإحمرار و الحروق و حروق الشمس و الجلد المتهيج .
طبعاً اشتريت منه ، على فكرة التعليب تغير عن قبل و سعره بحوالي 12 ريال .
كريم اليدين للتفتيح الطبيعي من نيفيا | Nivea Hand Cream Natural Fairness
تكلمت عنه في انستقرام ، لا بأس به لكن من تجربتي كريم نيفيا بالأرغان أفضل منه .
بالتالي ما برجع اشتريه .
شامبو الكيراتين من سيوس | Keratin Shampoo By Syoss
هذا الشيء لاحبيته و لابرجع اشتريه و من زود الورطة حجمه كبير " 500 مل " و بالعافية خلص ، نفسي ما طاوعتني أرميه .
هذا الشامبو يوعد على تقوية بنية الشعر و إضفاء ملمس ناعم و يحسن التسريح و يوفر ليونة وحيوية ، من هالنواحي اوكي تماام مافيه شيء ، من ناحية ثانية لما أجي اغسل شعري يخيليه يابس و الله أخاف يتقطع - يمكن أنا موسوسة بعض الشيء - ، كمان تخيلت إنه يحافظ على لفة خصل الشعر ، صار شكلها طايح أكثر و أنا ما أحب هالمظهر .
المهم إنه ماعجبني و لسه باقي عندي البلسم حقه ماخلص .
لوشن جسم من سانت آيفز | ST.Ives Daily hydrating Body Lotion
سانت آيفز من الماركات اللي أحبها و دايماً تعجبني منتجاتها ، لكن مشكلتها يا مخصلة من السوق يا مقطوعة :(
المهم هاللوشن ترطيبه جمااال ، هو مخصص للبشرات الجافة ، المواد المرطبة فيه طبيعية و خالي من البارابين و الفثالات .
عيبه في الريحة ممكن البعض ما يتقبلها .
أكيد بشتري منه مره ثانية .
ما أفتكر كم كان سعره لكن في المعقول أتوقع أقل من 40 ريال .
مقشر الجسم بالفانيليا من ايف روشيه | Yves Rocher Organic Vanilla Body Exfoliant
تكلمت عنه في انستقرام و في تدوينة الإستحمام ، هو يعتبر مقشر لطيف .. يعجبني في محلات ايف روشيه إنه منتجاتها طبيعة و أسعارها في المعقول ، العيب الوحيد مالهم فروع في مدينتي ، ياليت عندهم خدمة التسوق اون لاين .
جل الإستحمام المقشر من ايف روشيه | Yves Rocher Exfoliating Shower Gel
تكلمت عنه في تدوينة الإستحمام و انستقرام ، تقشيره مررره خفيف لا يكاد يذكر لكن من ناحية كونه جل استحمام فهو ممتازة .
من المنتجات اللي تعجبني في ايف روشيه و أكيد بأخذ منه لما أزور المحل مره ثانية .
تونر منعش من نيفيا | Nivea Refreshing Toner
من التونرز الجيدة ،هو للبشرة العادية .. ينقي و يزيل البقايا و فيه شوية ترطيب لكن أفضل النوع اللي للبشرة الحساسة .
ما راح أشتريه حتى أخلص اللي عندي أول .
غسول الفم من ليسترين | Mouthwash Listerine Total Care Zero
سبق و تكلمت عنه في التدوينات السابقة إنه غسول الفم الأفضل اللي جربته حتى الآن و أكيد برجع اشتريه كل مرة .
سعره 30 أو 31 ريال مو فاكرة كم بالضبط .
واقي الشمس اليومي من Image Skincare
تقريباً هذا أفضل نوع جربته و ناسب طبيعة بشرتي ، ممكن يكون سعره شوي غالي بالنسبة للبعض و عموماً الماركة هذه أسعارها مرتفعة شوي .
سعره أعتقد في الـ 100 .
تكلمت عنه في تدوينة أساسيات العناية بالبشرة [ هنا ] .
و طبعاً أكيد برجع أخذ منه .
قناعين و مقشر من هيمالايا .
اللي يعرفني من زمان يدري إني مدمنة لمنتجات همالايا و الأقنعة خصوصاً ، ي كثر ما أتكلمت عنها و سبق و كتبت عنهم تدوينات مفصلة [ الأقنعة ، المقشرات ] .
أسعارها معقولة أقل من 25 ريال .
ما بشتري منها هالفترة حتى أخلص اللي عندي .
لوشن مرطب للإشراق من جيفنشي .
حلو ترطيبه ، بارد على البشرة كانت تجربه ممتعة .. لكن ما حسيته أضاف شيء لبشرتي ، لذلك ما أفكر اشتريه .
تكلمت عنه [ هنا ] .
كريم التفتيح مزدوج المفعول من أورنج ديلي .
تكلمت عنه [ هنا ] .
حلو لنضارة الوجة و التفتيح البسيط و حبيت نتيجته ، لكن هالفترة ما احتاج اشتريه .
زبدة بالمرز .
تكلمت عنها كثير ، مرره جيدة لترطيب الأماكن الجافة في الجسم و للأماكن اللي فيها علامات تمدد ،تخفف منها كثير .
من مشترياتي الدائمة .
قطرات ترطيب العين ريفرش بلس .
تكلمت عنها في انستقرام ، استخدمها لما تكون عيني مرهقة أو اشتغلت لوقت طويل على الأجهزة .
استخدامي لها مو ادمان عند الحاجة فقط ، مع ذلك أشوفها منتج ضروري عندي .
سعرها مابين الـ 18 و الـ 20 ريال .
ماسكارا ريميل سكاندلآيز روكين كيرفز
تكلمت عنها [ هنا ] .
نتيجتها حلوة و عجبتني لكن مساءلة خروج كمية زايدة من المنتج و أجلس أنظف كل مره تخليني أمل منها و ما أفكر أشتريها مستقبلاً و على الأغلب ما بشتريها مره ثانية حتى أخلص الماسكارات اللي عندي و أجرب الجديد اللي حابه أجربه .
عينة ظلال من جيفنشي .
تكلمت عنها [ هنا ]
ماكانت قد تصوري لها و خيبت توقعاتي ، فطبعاً ما بشتريها .
مناديل نقية للتنظيف من نيفيا .
هذا النوع لجميع أنواع البشرة و خالية من العطر و الكحول و الزيت و الملونات .
مذكور عليها إنها تزيل المكياج المقاوم للماء و الماسكارا ، ايوه تشيل معظم المكياج لكن ماتكفي لحالها يحتاج تنظيف عميق للبشرة بعدها .
لسى باقي عندي مزيلات مكياج مختلفة لما تخلص أكيد برجع اشتري منها .
اللاصقات المزيلة للبقع من مجموعة بيور سيستم من ايف روشيه
تكلمت عنها في تدوينة مفصلة [ هنا ] .
حبيت فكرتها و النتيجة اللي حصلت عليها و أكيد برجع اشتريها كأحد حلول الطواري لبشرتي .
جل التنظيف العميق المنقي للبشرة من فيشي
تكلمت عنه [ هنا ] و هو من مفضلاتي لـ 2015 ، حالياً عندي غسول مجموعة البيور سيستم و بعد ما يخلص أفكر ارجع اشتري غسول فيشي أو ممكن أجرب حاجة جديدة .
بكذا انتيهت من ذكر المنتجات اللي خلصتها في الأشهر الماضية ، لو مجربين منها شيء شاركوني تجاربكم ، أيضاً لو في منتجات حلوة جربتوها أقترحوها على يمكن يكون عند فضول أجربها و تحمسوني عليها .
صفحاتي الإجتماعية في يمين المدونة
في امان الله
شوقتيني اشتري اللصقات المزيله للبقع بس مدري تخفف بقع الحبوب الي تكوون دوبها مخليه اثر ...ومشاء الله من اي مدينه انتي 🌹
ردحذفتخفف من آثار البقع الجديدة و بعض أنواع الحبوب .
حذف