السلام عليكم و رحمة الله و بركاته
كيفكم بنات ؟ .. إن شاء الله كلكم بخير 😘
تدوينة اليوم بكمل فيها كلامي عن فرش المكياج ، لكن بخصصها للفرش الإحترافية اللي تحتاجها أي وحده حابه تتعمق في المكياج و تصير فيه أكثر خبرة ..
بمعنى أدق عن فرش العيون و الفرش المخصصة للتفاصيل الصغيرة .
قبل تكلمت عن إختيار فرش المكياج [ هنا ] .
بشكل عام هالنوع من الفرش أشوفه يحمل فكرة مبتكرة و شكل فريد و يفرغ جيوبنا ، بمعنى إنه الفرشة محدودة الإستخدام ماهي عملية مع الميزانيات العامة أو المستخدمة العادية ، حلو لما الفرشة تكون تحتمل أكثر من استخدام مو محدده بإستخدام معين أو منتج معين .
لذلك يابنات لا تعميكم الدعاية لنوع جديد من الفرش و تتخيلوا إنه مكياجكم ما يصير حلو إلا بها ، في النهاية مهما تعددت أهداف و رؤية الشركة المنتجة بيكون هدفها الأساسي ربحي ، فخليك حكيمة في إختيارك و لا تضيعي فلوسك على شيء بيجلس مركون على التسريحة و لا استفدتي منه .
كوني جزء من عالمي ~
فرش الكونتور و الإضاءة
كل يوم نشوف شكل جديد لها ، و لو كنتوا مهتمين بالمكياج لـكنتوا لاحظتوا إن العام الماضي كان الثورة في منتجات الكونتور حتى الفرش لها من الضجة و الترويج نصيب و كل ماركة بدعت في ابتكار و تميزت .
المهم ..
بشكل عام فرش الكونتور " للمنتجات البودرية " أفضل تكون ذا شعر طبيعي أو قريب للطبيعي ، الفرش ذات الرأس المدورة و تكون شوي منفوشة جيدة للتوزيع و تعطي مظهر طبيعي .
فرش الكونتور " الكريمي " شعرها يكون صناعي ، و كل ماكانت من نوعية فرش الكابوكي كان أفضل ، لسهولة الإستخدام إختاري الفرش المدببة أو ذات الرأس المحدد .
الإضاءة .. الصراحة الصراحة سواء بأي بتركيبة كانت ما أشوفها أحلى إلا لما أوزعها بالأصابع .
لكن لو حبيتي تستخدمي فرش عندك فرشة المروحة و فرش الكابوكي الصغيرة تعطي نتيجة حلوة.
فرش وضع الظلال
نفس الشيء كثيرة و متنوعة ، لكن وظيفتها الأساسية توزيع الظل على منطقة الجفن .
شكلها في الغالب مسطحه و طرفها مقوس .
بعض الأنواع تكون قصيرة و تهدف للتحديد بشكل أدق .
بعضها تكون بشعر مُصنع و تعتبر جيدة للكونسيلر .
توضيح للفرش اللي في الصورة - من اليمين - : 1- تنفع للإضاء تحت الحاجب و في مدمع العين و لتحديد العين تحت خط الرموش السفلي ، 2-3- تنفع للكونسيلر ، 4- حلوه لتوزيع الظل على الجفن ، 5- تنفع للظلال في المساحات الصغيرة من العين و لتوزيع الإضاءة و لتحديد العين .
عموماً تقدري تنوعي في استخدامها بحسب طريقة استخدامك لها ، أحيان استخدم هالنوع من الفرش في وضع الكنتور الكريمي في أماكن معينة و أدمجة بإسفنجة و ممكن تلقي لها استخدامات ثانية تناسبك ، بالإضافة إنه في تنوع حالياً يعني ممكن تلقي فرشة مصممه لتعطي أكثر من وظيفة مثلاً بعض فرش الظلال تجي كثيفة و شوي منفوشة بالتالي تنفع للدمج و لوضع الظلال .
رأيي في الفرش في الصورة السابقة [ مكياجي ، بيسك كير& MD ] .
رأيي في الفرش في الصورة السابقة [ مكياجي ، بيسك كير& MD ] .
فرش الدمج
فرش الدمج مهمتها إما لتمويه اللون أو لتركيزة بشكل أكبر .
الفرش اللي يكون رأسها مدور و منفوشة غالباً تنفع لدمج الظلال مع بعض و التمويه .
أما الفرش اللي رأسها يميل للشكل المدبب أو ممكن نسميها فرشة القلم هذا لها الأفضلية في إعطاء تركيز أكبر لـ اللون
توضيح للفرش اللي في الصورة - من اليمين - : 1- فرشة دمج مشطوفة من الفرش العملية في السفر بالنسبة لي ، 2-3- فرش دمج تنفع لتمويه الظلال ، 4- فرشة دمج مدببة تنفع لتركيز اللون في كسرة العين و تنفع لـكونتور الأنف ، 5- فرشة القلم حلوة لإضاءة العين و لدمج الظلال تحت خط الرموش السفلي ، 6- فرشة السموكي
فرش الكحل
لو كنتِ من محبي الكحل الكريمي ، فأكيد إنكِ تبحثي عن فرشة مناسبة .. الأشكال كثيرة و متنوعة و مو الكل متفق على شكل معين .
الفرش المشطوفة استخدامتها كثيرة و متنوعة ، فمثلاً : نشوف البعض مخليها للكحل و غيرهم للحواجب و آخريين للظلال تحت العين و هلم جرا .
الفرش النحيفة ( الريشة ) .. حلوه للشغل الدقيق و تناسب غالباً للأكحال الكريمة و تضبط رسمة الكحل في الزوايا الصعبة .
فرش الأرواج [ التفاصيل الدقيقة ]
يميزها صغر حجمها ، قصات طرفها إما تكون مدورة أو حادة ، تقدري تعوضي عنها بأي فرشة عيون حجمها صغير .
الحلو في هالنوع من الفرش تقدري تستخدميها لكذا استخدام للكونسيلر ، للعيون ، للروج و غيرها .
و في الأخير مو كل فرشة في الحياة لازم تكون عندك ، لو كنت تحبي تحطي الأساس بأصابعك أو الأسفنجة مو ضروري تأخذي فرشة و تركينها على جنب .. اختاري الفرش المناسبة لطبيعة استخدامك .
المساءلة مو تباهي بعدد الفرش أو إنها ضرورية للكل ، لا بالعكس كل وحده تختلف طبيعة إستخدامها فبالتأكيد يختلف اختيارها و عدد فرشها عن غيرها .
طيب بالنسبة للبنات اللي ماعندهم ميزانية كافية يشتروا فرش متنوعة أو مايحبوا كثرة أدوات المكياج ، لكم تدوينة في المستقبل القريب عن فرش أساسية و تعتبر متعددة الإستخدام بمعنى آخر توفر عليكِ مالياً و مساحة في التسريحة .
و كالعادة شاركوني رأيكم حول موضوع التدوينة ، تعليقاتكم تلهمني ❤
صفحاتي الإجتماعية في يمين المدونة
في امان الله
تعليقات
إرسال تعليق