صباح النور 🌷
متخيلين إني قربت أكمل سنة و مانزلت شيء في هذه السلسة !
الحمدلله نجحت في تقنين استعمالي للمنتجات سواء مكياج أو عناية ، وصرت فعلًا ما أستخدم الا اللي أحتاجه .
في مشكلة بالنسبة لمنتجات المكياج حجمها كبير و صعب الوحده تخلصها تمامًا لو ما كانت مدمنة للمكياج بشكل يومي !
فنصحية مني حاولي تأخذي من قسم السفر في سيفورا دايمًا ألاقي منتجات بحجم صغير ، وشفت بعض المواقع توفرها زي نمشي و ذالفيف اي .
نشوف ايش خلصت خلال هذه الفترة الطويلة ، بالإضافة بتكلم بشكل جدًا مختصر عن المنتجات و أي منتج كتبت عنه تدوينة بحط لكم رابطها تشوفها على راحتكم .
بخاخ ماجيك ريتاتش من لوريال
كتبت عنه ريفيو في انستقرام من فترة طويلة [ ريفيو الماجيك ريتاتش ]
طبعًا بكرر شرائه .. هذا من المنتجات اللي تفك أزمة .
سبراي لوريال لتثبيت الشعر
هذا السبراي غني عن التعريف ، و لحد الآن ما جربت شيء أفضل منه - اقترحوا علي لو تعرفوا شيء أفضل - .
أفضل الحجم الصغير لأن استخدامي محدود له في المناسبات و يكفيني مدة طويلة .
شامبو العناية و النضارة للشعر المعالج كيميائيًا من ايف روشيه
تكلمت عنه في انستقرام [ هنا ] ، و إن شاء الله بيكون في تدوينة قادمة عن منتجات الشعر اللي جربتها من ايف روشيه .
طبعًا بكرر شرائة ، يكفي أن ايف روشيه منتجاتها نباتيه و سعرها معقول .
بديل الزيت من دوف
من مدة نزلت بوست عن طرق استخدامه في انستقرام [ بديل الزيت ] و كانت مشاركاتكم لطيفة ، انبسطت بتفاعلكم .
بديل الزيت من المنتجات اللي تخدمني بكذا استعمال بديل لـ : البلسم و ماسك الشعر .
طلوا على تدوينة [ العناية بالشعر ] و [ جهاز التقصف ] .
مضاد التعرق من فيشي
معتمد عندي وقت الدوام ، مفعول ممتاز و لطيف على البشرة .
منتجات فيشي في العناية الشخصية معتمدة عندي و دايم أرجع اشتري منها .
صابونة مفتحة للعناية الشخصية من بيزلين
لها ريفيو على انستقرام [ هنا ] .
تعجبني إنها صابونة طبيعية و لطيفة على البشرة أكثر من كونها مفتحة .
للأسف رحت اشتري منها لكن مالقيتها .
شاورجل مقشر بالتوت من ايف روشيه
من منتجات الإستحمام المفضلة عندي و هذا شكل التعليب الجديد وفي الريفيو الشكل القديم [ هـــنا ]
هالفترة ما أحتاجه ، عندي منتجات تقوم مقامه و لما تخلص أرجع اشتريه .
زبدة الشيا من ايف روشيه
أكيد ملاحظين التعليب أختلف - نوع من التجديد في المحل - .
[ هنا ] ريفيو عليها في انستقرام .
طبعُا لازم أشتري منها من أفضل منتجات الترطيب اللي جربتها .
كريم اليدين من د. أورجانيك
تجربة حلوة و يرطب الصراحة لكن جربت اللي أفضل منه و ما بكرر شرائه .
تكلمت عنه [ هــنــا ] .
كريم الشيا لتغذية البشرة فائقة الجفاف من ايف روشيه
هذا من كريمات العناية اليومية اللي معتمدتها للأيدي و الأرجل ، طبعًا أشتري منه بشكل دائم .
سيبيوم H2O من بيودرما
يشبه منظف المكياج [ سنسيبيو ] لكنه من ضمن مجموعة البشرة المعرضة لظهور الحبوب .
بالنسبة لي الـ سيبيوم كان أفضل و أتوقع أرجع اشتريه مستقبلًا في الفترة الحالية ما أحتاجه .
غسول المندرين لتضييق المسامات من هيمالايا
هالغسول مناسب للبشرة المختلطة إلى الدهنية .. فعلًا هو الغسول اللي أحتاجه مناسب لطبيعة بشرتي و ينظف المسامات بشكل ممتاز
طبعًا صار من المنتجات المعتمدة و بشتريه في كل مره .
تكلمت عن كل غسولات هيمالايا اللي جربتها [ هــنــا ]
قناع يتقشر غني بالنيم لتنقية البشرة من هيمالايا
هالنوع من الأقنعة أحبه ينظف كل المسامات بشكل رائع و يشيل كل القشور من البشرة و يصير ملمسها ناعم .
من مفضلاتي المعتمدة أكيد بشتري منه كل مرة ، و تكلمت عن [ هــنــا ] .
مرطب الشفاه بالشيا من ايف روشيه
ما عجبني و لا رجعت اشتريه .. لكن عندي نفسه بالمكديما ممتاز الصراحة .
كريم هلامي لترطيب البشرة من هيمالايا
تكلمت عنه [ هـنـا ] .. يعجبني لكن ما بشتريه هالفترة عندي كريم ثاني لما يخلص ممكن أرجع اشتريه .
Sébium Pore refiner من بيودرما
علاج تصحيحي يشد المسام المتوسعة ويحسن بنية البشرة ، بالفعل شفت له نتيجة حلوة و ممكن أرجع اشتريه في المستقبل اما حاليًا ما أحتاجه عندي بديل له .
بيبانثين
كريم مرطب لا غنى لي عنه ضروري يكون عندي منه .
تكلمت عنه [ هنـــا ] .
مسك الختام : ريحته مميزة فيها صندل .
مسك الجسم : ريحته هادئة و على بودرة .
أرزة لبنان : ريحته على أزهار و بودر .
قريبًا بكتب عنها ريفيو مفصل ..
كل هالثلاث أحبهم و أكرر شرائهم دائمًا .
فرشة ماكس فاكتور
كتبت [ ريفيو ] عنها ، اعتبرها فضول التجربة و انتهت .. ما أفكر اشتري بدالها في الأساس عندي اكتفاء من فرش المكياج .
محدد ريميل وايلد كلفر
مع إني أحبه لكن أفكر أجرب بديل له من براند ثانية ، كتبت عنه [ تدوينة ] .
قلم الكحل البني من ماكس فاكتور
أحب الأكحال البنية لكن هالمره مابكرر شرائه بجرب من براند ثانية ، كتبت عن [ هـــنــــا ] .
كشكل تعليب حلو و سهل في الرسم لكن بالنسبة للتركيبة بعد مدة قصيرة من الإستعمال انفصلت و تفككت فمعناه انه خرب و الصراحة أفضل ارميه .. ما أتوقع أفكر أشتريه طالما عندي جل لاينر انجلوت و التاتو لاينر من كات فون دي .
ماسكرا Masterpiece Transform و دارك ماجيك من ماكس فاكتور
كلهم حلويين و ممكن أشتري الدارك ماجيك في المستقبل لكن لازم أخلص اللي عندي أول بعدها أفكر اشتري .
بكذا انتهت 😌
في امان الله
محتواك جدا يجننننننن استمري ياقمر🌹🌹
ردحذفمحتواك جدا يجننننننن استمري ياقمر🌹🌹
ردحذفمحتواك جدا يجننننننن استمري ياقمر🌹🌹
ردحذفمحتواك جداااا رائع استمري جميلتي 🌹🌹
ردحذف