السلام عليكم و رحمة الله و بركاته
كيفكم بنات ؟ .. إن شاء الله كلكم بخير
كيف تظهري بأبهى حله يوم العيد .. ايش التجهيزات اللازمة .. ايش المكياج الأفضل لـ صباح / مساء العيد .
و شوية أمور مهمة لطلة العيد
عنايتك بنفسك لازم تكون منتظمة و مو محدودة بمناسبات معينة .. أعرف كثير ما تهتم بنفسها غير قبل المناسبة بكم يوم و تبغى فرق كبير .. لا يا حبيبتى ما راح يبن الفرق اللي تحلمي فيه .
خليك في السليم و أتعودي تخلي عنايتك دايمه مو محدودة بمناسبات ، صدقيني بتشوفي الفرق واضح بعد فترة لابأس بها من الاهتمام و العناية .
قرقرت عليكم كثير خلونا ندخل في صلب الموضوع .
قبل تكلمت عن موضوع الإستعداد للمناسبات و حقيقة مايفرق كثير عن الإستعداد للعيد طلوا على الموضوع [ هنا ] .
البشرة :
كيف أجهز بشرتي ليوم العيد ؟!!
المفروض يكون عندك روتين عناية ماشية عليه من زمان و لما يقرب العيد تبدئي تضيفي عليه شوية جلسات عناية مكثفة مره بالأسبوع أو كل أسبوعين كافية سواء سويتها بالبيت أو في صالون أو مركز عناية بالبشرة .
لكن أعرف أغلبكم اما يهتم و يترك فترة و يرجع يهتم أو من الأساس ما تهتم ببشرتها .. لاتخافي معك فرصة خلال هالأسبوع تتدراكي الوضع .
من أهم أهم أهم الأشياء اللي تسوي فرق في البشرة الموية + الخضروات الخضراء .. بعد الإفطار اشربي كوب مويه كل ساعه تقريباً كذا تضمني إنك رويتي جسمك بإحتياجه من الماء ، و لا تنسى السلطة الخضراء كثري منها هالفترة بتعطي مفعول جميل للبشرة .
خصصي لك وقت تعتني ببشرتك .. اما بعد ما تخلصي شغل البيت و الطبخ أو قبل ما تنامي .. المهم يكون الوقت مناسب و مريح لك .
تكلمت عن روتين العناية بالبشرة قبل [ هنا ، هنا ، هنا ، هنا ] فما بعيد كلامي مره ثانية و أطول تدوينة اليوم زيادة .
بالنسبة لي في ليلة العيد روتين عنايتي كالعادة لكن أضيف ماسك منظف أو مقشر و أركز على ترطيب المناطق الجافة في وجهي .
و أنتم تقدروا تضيفوا الخطوة المناسبة لكم سواء تستخدموا مقشر بس أو ماسك مهدئ أو أي خطوة تحبوا تسووها قبل المناسبة .
** بعض المنتجات اللي طلعت في الصورة تكلمت عنها قبل => [ قناع شجرة الشاي ، كريم أورنج ديلي للتفتيح ، فرشة أولاي لتنظيف البشرة ] .
العناية بالجسم :
قبل العيد بأسبوع - أو كم يوم - أسوي تقشير و تنظيف عميق لبشرة جسمي .
ليه قبل العيد بأسبوع ؟!!
لأن روتين حياتي مشغول فمن المهم أخذ احتياطي من بدري و أسوي جلسة عناية مكثفة قبل العيد بفترة بسيطة .
و بالنسبة للشعر الزائد قبل العيد بيومين أو ثلاثة مناسب لإزالته ، و تكلمت عن طرق إزالة الشعر[ هنا ].
ليلة العيد أخذ لي حمام منعش و أستخدم مقشر خفيف أو جل مقشر و بيفي بالغرض لأني قبل أسبوع نظفت و قشرت جسمي بشكل عميق .
و الترطيب مهم - هو من الأساس مهم كل يوم p: -
** منتجات العناية بالجسم نادر أكتب عنها تدوينات مفصلة ، غالباً تلقوني كتبت عنها في تدوينات منتجات خلصتها أو في انستقرام **
العناية باليدين و القدمين :
بالنسبة للعناية بالقدمين و اليدين للعيد بالعادة أسوي جلسة تنظيف و ترطيب عميقة لهم يوم 28 - غالباً مافي شغل كثير في الأيام الأخيرة فأستغل الفرص في تدليل يدي و قدمي -.
شوفتوا جل الفازلين بزبدة الكاكاو هذا ترطيبه يجنن ، احط قبل النوم على رجولي و أصحى ألقيها مترطبة بشكل جيد - على فكرة ريحته سيئة جداً بالنسبة لي ، لكن اتغاضى عنها عشان ترطيبه ممتاز- .
العناية بالشعر
أنا وحده مو دايم أحط ماسكات أو حمام زيت لشعري ، يمكن لأن طبيعة شعري ما تتحمل .
فيكفي مرتين في الشهر أعتني بشعري عناية مكثفة من ماسكات و زيوت و غيره .. و منتج واحد يكفيني في جلسة العناية ..
تجهيز تسريحة شعري ليوم العيد غالباً ليلة العيد أكون صاحية في الليل فأسوي شعري و لأن عيدنا في الصباح فأفضل تسريحات الشعر المرفوعة و كمان لما نروح نعيد أكون بعبايتي أغلب الوقت و هذا يخيلني أختار التسريحات الناعمة الكلاسيكة .
أما في الليل فباب الأبداع مفتوح و أفكار التسريحات كثيرة لكن غالباً ألف و أدور و أرجع أسوي شعري كيرلي - أريح شيء - .
المكياج
لازم تكوني مخططة للي بتسويه من بدري حتى يكفيك الوقت و تلحقى تعيدي مع الناس من بدري .
مكياج العيد في الصباح عندنا يكون بسيط و ناعم خصوصاً أول يوم في العيد الناس بتجي تعيد و تشرب قهوتها و تمشي و أنتِ بتحتاجي تتحركي كثير و ممكن تخرجي تعيدي كمان من غير التصوير في أول يوم في العيد .
لو كان طابع عيدكم كذا فالأفضل تختاري منتجات مكياج ثباتها طويل و تتحمل الحر و الرطوبة.
و في الليل و العزومات أطلقي ابداعك لأنه غالباً تكوني ضيفة - طبعاً مو تبدعي فوق المعقول p: -
عموماً لبسك و تسريحتك يوم العيد تحكم مكياجك و كمان طابع عيدكم و متى تخرجوا تعيدو و طبيعة العزومات في مجتمعكم كيف كلها تحدد اختياراتك في لوك المكياج .
وجهة نظر
لو كان لبسك ملفت سواء لونه قوي أو مشغول أو في ضمن تنسيقك قطع بارزه فالأفضل مكياجك يميل للهدوء و النعومة يعني ما تشطحي كثير و تخلي مكياجك بارز، أعطي كل شيء في مظهرك حقه بيطلع شكلك ناعم و مرتب و الأناقة تقطر منك .
تنسيقك للبسك هادئ و ناعم ، حلو إنك تبرزي شيء في مكياجك .. الآيلاينر فيه مجال واسع للإبتكار ممكن تستخدمي فيه أكثر من لون .. تخلي فيه لمحة جرافيتيه ، الظلال ، الروج كلهم نفس الشيء لكن الأفضل و الأسلم تعتمدي على إبراز شيء واحد في مكياجك .
و أهم شيء أعطي عمرك حقه ، البعض يخطيء في اختياراته في المكياج فيظهر بشكل مايناسبه و ممكن يعطي عمر أكبر .. فلو كان عندك أحد يعرف في المكياج أمك .. أختك .. قريبتك .... استشيريها في اختيارك ممكن تنبهك لشيء غفلتي عنه .
و بعد ما انبسطنا و فرحنا و رجعنا للبيت باقي شيء مهم !!
تنظيف البشرة من المكياج و ترطيبها .. مهم مهم مهم جداً ، انتبهي تهملي هالخطوة .
قبل تكلمت عن إزالة المكياج [ هنا ] حالياً طريقتي أختلفت عن قبل لو حبيتوا أتكلم عنها اكتبوا لي في التعليقات .
و بكذا خلصت تدوينة اليوم ، لو عندكم معلومات حابين تضيفوها أو تشاركوا طريقتكم في التجهز للعيد اكتبوها في التعليقات .
صفحاتي الإجتماعية في يمين المدونة
في امان الله
ابي فير حلو للشعر اذا تعرفي ياليت تكتبي اسمه وسعره ومن وين اخذه انا من الرياض
ردحذفاستخدم فير من بابليس و مرتاحه معه ، أعتقد إني أخذته بحوالي 150 ريال مو فاكرة كم بالضبط و متوفر في الصيدليات و مراكز التجميل .
حذفكمان يمدحوا فير جوسي ابير لكن ما جربته .
كالعاده متميزه في طرحك ودايما تدويناتك خفبفه وتحمس واذا على القرقره ياليت كل الناس تقرقر نفسك على سنع؛).... بانسبه للفازلين في فازلين بالصبار تهبببل ريحته انصحك تستخدميه ....وشي ثاني اباسألك عنه حامي الشعر سايوس انا عندي نفسه بس المشكله اذا استشورت شعري او سرمكته بعده يطلعلي نفس القشره على شعري وعلى الاستشوار وحتى وانا مغسلته انتي نفسي ولابس انا ...زودتهاصح:0
ردحذفتسلمي يا جميلة ❤❤
حذفأكيد بجربه 👍🏻
حامي الشعر سايوس هو ممتاز في الحماية لكن ما عجبتني ريحته و كمان يخلي شعري ينفش و يصير ملمسه غريب ..هذا اللي صار معي .
عادي ياقلبي �❤❤�
عايزة اعرف الميكياج المناسب للتصوير بحيث مش يعمل فلاش باك لما اتصور
ردحذفانتبهي مايكون فيه " spf= عامل واقية من الشمس " و غالباً اللي يكون مكتوب عليه HD فهو مناسب للتصوير .
حذف